Қарамайдики мусулманларниң мәсчит селиш иши чәклимигә учримақта
2014.11.04
Қарамай шәһиридики йәрлик даириләр 2007-йилдин башлап қарамай шәһәр көлимини кеңәйтиш мәқситидә қарамай шәһиригә қарашлиқ 5-завут, нефит синаш, 3-завут қатарлиқ районлардики ишчи -хизмәтчиләр аһалилирини қарамай шәһәр ичигә көчүрүп елип киргән иди.
Даириләр көчкән районда хәлққә қулай орунларниң болушиға капаләтлик қилиш, болупму ислам диниға етиқад қилидиған ишчи-хизмәтчиләр үчүн диний паалийәт соруни болған һазирқи райондики мәсчитлири тақалса, шуниңға охшаш шәкилдики мәсчитләрни салдуруп беришкә вәдиләрни қилған иди.
Әмма, һазир қарамай шәһәрлик йәрлик даириләрниң қилған вәдисигә 6 йилдин ашқан болсиму, 5-завут вә нефит синаш райондики мәсчитләр тақалған, әмма униң орниға қарамай шәһәр ичигә мәсчит селип бериш вәдиси техичә әмәлийләшмигән.
Биз бу тоғрисида мәлумат елиш үчүн қарамай шәһиригә қарашлиқ 3-завут мәсчитиниң имамидин әһвал игиләшкә тириштуқ. Биз йәниму тәпсилий мәлуматқа еришиш үчүн 3-завут мәсчити идарә һәйәт мәсул хадими билән сөһбәт елип бардуқ. Уларниң инкас қилишичә, қарамай шәһиридики йәрлик даириләр “қарамай шәһиригә мәсчит селиш ишлирида йәр йоқ, муқимлиққа тәсир йетиду” дегәндәк баһаниләр билән мәсчит селишни чәкләп кәлгән.