Қазақистанда һиҗаб кийиш мәсилиси йәнә талаш - тартиш қозғимақта

Қазақистанда һиҗаб кийгәнләргә нисбәтән икки хил көз қарашниң шәкилләнгәнлики һәққидә аммиви ахбарат васитилиридә мақалиләр елан қилинмақта. Һазир қазақистан мусулманлириниң диний башқармиси вә мәмликәтниң билим вә пән министирлиқи оттурисида әнә шундақ әһвал мәвҗут.

“сентир асия” да елан қилинған гүлмира мәтхалиқованиң “яғлиқ шилтиди. Қазақистанда алаһидә бир әһвал шәкиллинип, мәктәп вә алий оқуш орунлириниң оқуғучилири һиҗабни йешиштин қәтий баш тартмақта” дегән мақалисидә диний башқарминиң баш муптиси ерҗан һаҗи малғаҗи оғли елан қилған пәтиваниң диққәттин сирт қалғанлиқини тәкитлигән. Апторниң ейтишичә, һиҗаб кийишни қоғдайдиған бу пәтива норуз байрими вақтида елан қилинғанлиқтин униңға көпчилик етибар бәрмигән. Пәтивада дәрскә киргән һәр қандақ бир кишигә яғлиқ яки башқиму баш кийим кийишни мәний қилишниң қануний диний паалийәтни чәклигәнлик, шәхсийләрниң гражданлиқ һоқуқлирини бузғанлиқ болуп һесаблинидиғанлиқи тәкитләнгән. Билим идарисиниң вәкили җанил җонтайева буниңға җавап берип, “билим тоғрилиқ қанун” тәләплири бойичә оқуғучиларниң бәлгилимидә бәкитилгән мәктәп кийимини сақлаш керәкликини ейтқан.

Қазақистан мусулманлириниң диний башқармиси мәркизий мәсчитиниң мәхсус “әзән кз” тор бети арқилиқ мусулманларниң яғлиқ теңиш һоқуқини чүшәндүрүп, буниң мәмликәт қанунлириға мас келидиғанлиқини көрсәткән. “тенгринюс агентлиқи” бу һәққидә мақалә елан қилип, униңда көплигән тәшкилатларниң өтүнишигә бенаән мәзкур пәтиваниң елан қилинғанлиқи ейтилған. Униңда мусулман аял кишиләрниң кийим кийиш қаидилири чүшәндүрүлгән. Диний башқарма шәриәткә мувапиқ келидиған ниқабсиз кийим кийишни тоғра дәп тепип, әрәб, пакистан истилидики кийимни тәкрарлашниң шәрт әмәсликини әскәрткән, әң алди билән әврәтлирини япидиған әнәнивий кийимләрни кийиш мумкинликини тәкитлигән. Униңда шундақла яғлиқ теңиш һоқуқиниң һәқиқәтәнму шәхсийләрниң динға болған мунасивитини көрситидиған гражданлиқ һоқуқи икәнлики ейтилған. Шу мунасивәт билән қазақистан мусулманлириниң диний башқармиси ишханилар вә оқуш орунлири рәһбәрлири тәрипидин көрситиливатқан мундақ чәклимиләрни қанунсиз дәп һесаблиди.

Радиомиз зияритини қобул қилған алмата шәһири турғунлири пешқәдәм устаз мәмликәт алимова вә асийәм турдийева бу һәқтә өз қарашлирини оттуриға қойди.