Америкида 2015-йиллиқ қурбан һейт: вашингтондин уйғурлар вәтинигә йолланған дуа-тиләкләр

Мухбиримиз қутлан
2015-09-24
Елхәт
Пикир
Share
Принт
Америка пайтәхти вашингтон вә униңға қошна вирҗинийә вә марилан штатлиридин йиғилған нәччә йүзлигән уйғур җамаити файрфакс районидики түрк җамәсигә җәм болуп, қурбан һейт намизини бирликтә оқуди. 2015-Йили 24-сентәбир, америка.
Америка пайтәхти вашингтон вә униңға қошна вирҗинийә вә марилан штатлиридин йиғилған нәччә йүзлигән уйғур җамаити файрфакс районидики түрк җамәсигә җәм болуп, қурбан һейт намизини бирликтә оқуди. 2015-Йили 24-сентәбир, америка.
Photo: RFA

Әссаламуәләйкум әләйкум, әзиз вәтәндашлар!

Бүгүн америкидики уйғур җамаити бир йәргә җәм болуп 2015-йиллиқ қурбан һейтни күтүвалди.

Америка пайтәхти вашингтон вә униңға қошна вирҗинийә вә марилан штатлиридин йиғилған нәччә йүзлигән уйғур җамаити файрфакс районидики түрк җамәсигә җәм болуп, қурбан һейт намизини бирликтә оқуди.

Җамаәт нурдун һаҗимниң имамәтчиликидә тәкбир ейтип мәсчиткә қәдәм басти. Америкиниң шәрқий қирғақтики һәрқайси штатлиридин йиғилған пешқәдәмләр, оттура яшлиқлар яш-өсмүрләр һәм балилар болуп 200 дин артуқ уйғур җамаити чоңқур ихлас билән һейт намизиға тәйярланди.

Намаздин бурун нурдун һаҗим вәз ейтип, һәҗниң мусулманлар үчүн пәрз қилинғанлиқи, қурбан һейт намизини оқуш билән қурбанлиқ қилишниң ваҗип қилинғанлиқи һәққидә чүшәнчә бәрди.

У йәнә «қуран кәрим» вә «һәдис» ләрдин нәқилләр кәлтүрүп, мусулманлар үчүн қурбан һейтниң әң улуғ күн икәнлики вә қурбанлиқ кесишниң хасийити һәққидә изаһат бәрди.

Қурбан һейт намизи оқулуп болушиға җамаәт нурдун һаҗимниң йетәкчиликидә дуаға қол көтүрди. Вәтән үчүн, уйғурларниң миллий вә диний һәқ-һоқуқлири үчүн җенини қурбан қилған шеһитларниң роһиға атап дуа-тилавәтләр оқулди. Хитайниң қараңғу зинданлирида йетиватқан вәтән оғланлири вә уларниң аилә тавабиатлириға аллаһдин ғәйрәт-җасарәт һәм сәбир тилиди.

Һейт намизиға кәлгән җамаәттин доктор җүрәт обул әпәнди зияритимизни қобул қилип, өзиниң бу қетимлиқ қурбан һейт намизи һәққидики тәсиратлирини мундақ баян қилди: «бу йил мән биринчи қетим қурбан һейтниң вәтән билән бир күндә өткүзүлгәнликини көрдүм. Адәттә һәр қетимлиқ һейт-айәмлиримиз вәтәнни дунядин айрип, бир күн бурун яки кейин өткүзүләтти. Мән һейт намизиға кәлгән уйғур җамаитиниң бир җайға җәм болған һәм бирликтә һейт намизи оқуған чағдики аҗайип җушқун кәйпияти һәм чоңқур ихласини һес қилдим. Буниң өзи уйғурларда миллий вә диний бурч йолида иттипақлишалайдиған, бир җайға җәм болалайдиған шундақла бир тиниқтин нәпәс алалайдиған йошурун ениргийәниң йоқап кәтмигәнликини көрситип турупту…»

Җүрәт обул әпәнди мәйли америкида болсун яки дуняниң җай-җайлирида болсун, муһаҗирәттә яшаватқан уйғур җамаити үчүн җамаәтлишишниң һәммидин муһимлиқини тәкитлиди. У йилда икки қетим келидиған һейт намизи вә башқа миллий һәм диний паалийәтләрниң муһаҗирәттики уйғурларни бир җайға җәм қилидиған, иттипақлаштуридиған шундақла миллий уюшушниң күч-қудритини тонутидиған қиммәтлик пурсәт икәнликини илгири сүрди.

Тәпсилатини аваз улиништин аңлиғайсиз.

Пикирләр (0)
Share
Толуқ бәт