Amérikida 2015-yilliq qurban héyt: washin'gtondin Uyghurlar wetinige yollan'ghan du'a-tilekler

Amérika paytexti washin'gton we uninggha qoshna wirjiniye we marilan shtatliridin yighilghan nechche yüzligen Uyghur jama'iti fayrfaks rayonidiki türk jamesige jem bolup, qurban héyt namizini birlikte oqudi. 2015-Yili 24-séntebir, amérika.

Essalamu'eleykum eleykum, eziz wetendashlar!

Bügün amérikidiki Uyghur jama'iti bir yerge jem bolup 2015-yilliq qurban héytni kütüwaldi.

Amérika paytexti washin'gton we uninggha qoshna wirjiniye we marilan shtatliridin yighilghan nechche yüzligen Uyghur jama'iti fayrfaks rayonidiki türk jamesige jem bolup, qurban héyt namizini birlikte oqudi.

Jama'et nurdun hajimning imametchilikide tekbir éytip meschitke qedem basti. Amérikining sherqiy qirghaqtiki herqaysi shtatliridin yighilghan péshqedemler, ottura yashliqlar yash-ösmürler hem balilar bolup 200 din artuq Uyghur jama'iti chongqur ixlas bilen héyt namizigha teyyarlandi.

Namazdin burun nurdun hajim wez éytip, hejning musulmanlar üchün perz qilin'ghanliqi, qurban héyt namizini oqush bilen qurbanliq qilishning wajip qilin'ghanliqi heqqide chüshenche berdi.

U yene “Qur'an kerim” we “Hedis” lerdin neqiller keltürüp, musulmanlar üchün qurban héytning eng ulugh kün ikenliki we qurbanliq késishning xasiyiti heqqide izahat berdi.

Qurban héyt namizi oqulup bolushigha jama'et nurdun hajimning yétekchilikide du'agha qol kötürdi. Weten üchün, Uyghurlarning milliy we diniy heq-hoquqliri üchün jénini qurban qilghan shéhitlarning rohigha atap du'a-tilawetler oquldi. Xitayning qarangghu zindanlirida yétiwatqan weten oghlanliri we ularning a'ile tawabi'atlirigha allahdin gheyret-jasaret hem sebir tilidi.

Héyt namizigha kelgen jama'ettin doktor jür'et obul ependi ziyaritimizni qobul qilip, özining bu qétimliq qurban héyt namizi heqqidiki tesiratlirini mundaq bayan qildi: “Bu yil men birinchi qétim qurban héytning weten bilen bir künde ötküzülgenlikini kördüm. Adette her qétimliq héyt-ayemlirimiz wetenni dunyadin ayrip, bir kün burun yaki kéyin ötküzületti. Men héyt namizigha kelgen Uyghur jama'itining bir jaygha jem bolghan hem birlikte héyt namizi oqughan chaghdiki ajayip jushqun keypiyati hem chongqur ixlasini hés qildim. Buning özi Uyghurlarda milliy we diniy burch yolida ittipaqlishalaydighan, bir jaygha jem bolalaydighan shundaqla bir tiniqtin nepes alalaydighan yoshurun énirgiyening yoqap ketmigenlikini körsitip turuptu…”

Jür'et obul ependi meyli amérikida bolsun yaki dunyaning jay-jaylirida bolsun, muhajirette yashawatqan Uyghur jama'iti üchün jama'etlishishning hemmidin muhimliqini tekitlidi. U yilda ikki qétim kélidighan héyt namizi we bashqa milliy hem diniy pa'aliyetlerning muhajirettiki Uyghurlarni bir jaygha jem qilidighan, ittipaqlashturidighan shundaqla milliy uyushushning küch-qudritini tonutidighan qimmetlik purset ikenlikini ilgiri sürdi.

Tepsilatini awaz ulinishtin anglighaysiz.