Da'irilerning 1 - iyul partiye bayrimi bahanisidiki pa'aliyetliri “Ramizan'gha buzghunchiliq qilish” dep eyiblendi

Xitayning hökümet taratquliri we radiyomiz igiligen ehwallardin melum bolushiche, Uyghur élidiki yerlik hökümet da'iriliri 1 - iyul partiye bayrimini tebriklesh namida, ötken ikki heptidin buyan xitay kompartiyisini medhiyileydighan qizil naxshilarni éytish, partiye nizamnamisi öginish qatarliq pa'aliyetlerni orunlashturghan. Da'irilerning musulmanlarning muqeddes éyi bolghan ramizan mezgilide Uyghur hökümet kadirliri, oqutquchi - oqughuchilarning roza tutushini chekligendin bashqa, yézilardiki déhqan yashliri, hetta ilgiri hökümet xizmitide bolghan moysipitlarnimu yighiwélishi, chet'ellerdiki Uyghur pa'aliyetchiliri we diniy zatlarning eyiblishige uchridi.

Ili rayonidin ziyaritimizni qobul qilghan bir déhqan, mezkur yézida peyshenbe küni kechte shu yézidiki yashlarni asas qilip teshkillen'gen xor ömiki we xelq sen'etkarlirining qatnashturulushida 1 - iyul partiye bayrimini tebriklesh pa'aliyiti ötküzülgenliki, emma özige oxshash köp qisim déhqanlarning bu pa'aliyetke qatnashmighanliqini bildürdi.

Xitayning hökümet taratquliridimu 1 - iyul xitay kompartiyisi bayrimi xatirilesh pa'aliyetlirining her xil shekillerde ötküzülüwatqanliqi heqqide köplep xewerler bérildi. Shinjang xewerler torining 30 - iyundiki bir xewiride jimisar nahiyiside 10 ming kishi yighilghan qizil naxsha éytish pa'aliyiti ötküzülüp, xitay kompartiyisining 95 yilliqi xatirilen'genliki xewer qilindi.

Ikki heptidin buyan Uyghur élining jenubidiki melum nahiyide ötküzülüwatqan bu xil qizil naxsha éytish pa'aliyetliri heqqide toxtalghan yene bir xanim, uning yéziliq hökümette ishleydighan uruq - tughqanliri we mehellidiki yashlarning ramizan kirishi bilenla yighiwélinip qizil naxsha xor ömikige qatnashturulghanliqini bildürdi.

Xitayning hökümet taratqulirida, Uyghur élining jenub we shimalidiki nahiye, yézilarda qizil naxsha éytish sen'et pa'aliyetliri ötküzülgendin bashqa, yéziliq hökümet kadirlirining mezkur yézigha chüshken xizmet guruppisidikiler bilen birlikte déhqanlargha kompartiyining siyasitini teshwiq qilish pa'aliyetliri élip bériwatqanliqi, ilgiri hökümet xizmitini ishligen péshqedem partiye ezalirining yéziliq hökümetning uyushturushi bilen partiye nizami öginish, özining ilgiriki xizmet tejribilirini yash kadirlargha tonushturush qatarliq chay ziyapetlirige qatnashqanliqi heqqide xewerler bérildi.

Da'irilerning ramizan mezgilide xitay kompartiyisining tughulghan künini xatirilesh namida élip bériwatqan bu xil pa'aliyetliri chet'ellerdiki Uyghur teshkilatliri, pa'aliyetchiliri we diniy zatlarning diqqitini qozghidi.

Dunya Uyghur qurultiyining ijra'iye komitéti mudiri dolqun eysa ependi ziyaritimizni qobul qilip, xitay hökümet da'irilirining yillardin buyan her xil bahanilerde Uyghurlarning diniy étiqad pa'aliyetlirini cheklep kéliwatqanliqini, bu yilqi ramizan mezgilidimu Uyghurlarni teshkillep élip bériliwatqan qizil naxsha éytish, kompartiye siyasitini teshwiq qilish pa'aliyetlirining emeliyette oxshash meqsette élip bériliwatqan “Uyghurlarning ramizan pa'aliyetlirige buzghunchiliq qilish herikiti” ikenlikini bildürdi.

Chet'ellerdiki diniy zatlardin dunya Uyghur qurultiyining diniy ishlar komitéti mudiri turghunjan alawudun ependi ziyaritimizni qobul qilip, dunya musulmanliri ramizanning 26 künini tamamlap, 27 - künidiki shiwi qedir kéchisini kütüwélish aldidiki bu xasiyetlik künlerde, xitay da'irilirining 1 - iyul partiye bayrimini tebriklesh namida Uyghurlarni yighiwélishi, Uyghur musulmanlirining ramizanning axirqi mezgilidiki ibadetliri we shiwi qedir kéchisidiki diniy pa'aliyetlirini qiyinlashturushni meqset qilghanliqini bildürdi.

Misir ezher uniwérsitétini tamamlighan diniy ölima turghunjan alawudun ependi yene, Uyghur musulmanlirining xitayning her xil teqibliri we bésimliri ichide dawamlishiwatqan ramizan éyining sawabi we xasiyitining téximu ulughluqini tekitlep, gerche xitay hökümet da'iriliri her xil bahane, yolsiz mejburlashlar, tehditler arqiliq Uyghurlarning rozisini buzushni dawamlashturuwatqan bolsimu, emma shu kishi öz eqidisi we niyiti bilen bashlighan rozini buzmaydighanliqini könglige pükken bolsila, uning rozisi we du'asining qobul bolidighanliqini bildürdi.

Turghunjan ependi sözining axirida Uyghurlarni öz ichige alghan barliq musulmanlarning ramizan éyini muweppeqiyetlik tamamlishigha tilekdashliq bildürdi.