Türkiye re'isining hej pa'aliyiti ereb dunyasida inkas qozghidi

Türkiye re'isi abdulla gül meschit heremning yénidiki méhman kütüshte. 2013-Yili 17-öktebir

Bu yil türkiye jumhuriyitining re'isi abdulla gülning se'udi erebistan padishahi abdullaning mexsus teklipi bilen kélip hej perzini ada qilghanliqi ereb metbu'atlirida her xil inkaslarni qozghidi.

Türkiye jumhuriyitining 90-yilida, 11-re'is jumhur hej qildi

Se'udi erebistanda chiqidighan “El medine” gézitide “Türkiye jumhuriyiti qurulghanliqining 90-yilida, 11-re'is jumhur abdulla gül hej qildi” dégen témida élan qilin'ghan bir maqalide mundaq dep yézilghan:“Türkiye jumhuriyiti dindin xali hakimiyet asasigha qurulghan bir dölet bolup, hazirghiche héchqandaq bir re'is jumhur mensepte turup hej qilip baqqan emes. Türkiye re'isi abdulla gülning re'is jumhurluq mensipide turup hej perzini ada qilghanliqi türkiyening heqiqiy démokratiyige qarap toxtimay ilgirilewatqanliqining bir ipadisidur. Türkiyediki we chet'ellerdiki bezi mutepekkurlar abdulla gülning nöwettiki hej pa'aliyiti ada qilghanliqi, dindin xali dölet (layiqliq‏-sékolarizm) tüzümige xilapliq qilghanliqimu yaki undaq emesmu dégen mesilide xéli ghulghula qozghighan bolsimu, türkiyening se'udi erebistanda turushluq bash elchisi fikret özer mexsus bayanat élan qilip, re'is jumhur abdulla gülning mensepte turup hej perzini ada qilghanliqining dindin xali dölet tüzümige xilap emeslikini, türkiyening din'gha qarshi bir dölet emeslikini, abdulla gülning dindin xali bolghan döletning re'isi bolghanliqi uning hej perzini ada qilishigha tosqun bolmaydighanliqini bildürdi.”

Türkiye barche islam ellirining közide

Yene se'udi erebistanda chiqidighan “Okaz” gézitide “Osman émpiriyesi yiqilghandin biri mensipide turup hej qilghan tunji re'is jumhur” dégen témida élan qilin'ghan bir maqalide mundaq dep yézilghan:
“Türkiyede osman émpiriyesi örülgendin kéyin, uning ornini layiqliq döliti alghan idi. Yéqin'ghiche türkiye jumhuriyitige barche islam elliri din'gha qarshi bir döletke qarighandek qaraytti, beziler sabiq sowét ittipaqighimu oxshitatti, ishqilip türkiyening islam we ereb ellirining neziridiki süriti shundaq idi. Yéqinqi yillardin bashlap türkiye özini bir musulman döliti süpitide ispatlidi we bashqilarnimu qayil qildi. Türkiye re'isi abdulla gülning bu yilqi hej pa'aliyiti türkiyening islam elliridiki we pütün dunya musulmanlirining qelbidiki abruyini téximu kötürdi we mu'eyyenleshtürgen boldi. Bu yilqi hejge pakistanning, mawritaniyening we sudanning re'is jumhurlirimu kelgen bolsimu, abdulla gülning kelgenliki köprek diqqetni jelp qilghan we ereb-islam metbu'atlirimu eng köp abdulla gül heqqide xewer tarqatqan. Bu dégenlik türkiye barche islam ellirining közide dégenliktur.”

Türkiye layiqliq bilen islamni teng élip barghan dölet

Yene se'udi erebistanda chiqidighan “Elweten” gézitide élan qilin'ghan bir maqalide mundaq dep yézilghan:
“Türkiye jumhuriyitining re'isi hejge kelse néme üchün hemmining diqqitini jelp qilidiken? türkiye musulman döliti, re'is jumhurmu musulman emesmu? bu ish ejeblinerlik emes. Belki shundaq bolushi tebi'iy ehwaldur. Chünki türkiye layiqliq bilen islamni bir-birige zit qilip qoymastin, teng élip bériwatqan, démokratiye dése, heqiqiy démokratiyini körgili bolidighan, islam dése, heqiqiy musulmanchiliqni körgili bolidighan, heq-hoquq dése, hemmini toluq tapqili bolidighan bir ilghar dölet. Mundaq bir döletning re'is jumhuri hej perzini ada qilsa, ejeblinip kétish hajetsiz. Belki hej qilmighanlar üchün epsuslinish lazim. Chünki hej dégen allah ta'alla musulmanlargha perz qilghan bir muhim ibadet. Musulman bolghan adem meyli re'is bolsun, meyli adettiki puqra bolsun, qudriti yetse uni choqum orundishi lazim.”