Шиветсийәдә уйғур мәсчитиниң ечилиш мурасими өткүзүлди

Шиветсийидә паалийәт қиливатқан “тәклимакан ислам мәдәнийәт мәркизи”, шиветсийәдики уйғурларни бир йәргә җәм қилиш, иттипақлаштуруш үчүн бирқанчә йилдин бери башқиларниң мәсчитлирини иҗаригә елиш арқилиқ икки һейт намазлирини оқуп кәлгән иди.

Тәклимакан ислам мәдәнийәт мәркизиниң тиришчанлиқи вә шиветсийәдики уйғурларниң йеқиндин қоллап қувәтлиши билән, шивитсийә пайтәхти ситокһулмға қарашлиқ рисни районидики мәркизи йәрдин 200 квадират метирлиқ орунни иҗаригә елип уйғур мәсчитини қуруп чиқти.

12 - Авғуст күни шиветсийәдики уйғурлар уйғур мәсчитигә йиғилип, мәсчитиниң ечлиши мурасими билән тәң җумә намизини бирликтә оқуди.

Уйғур мәсчити имами өмәр мәхсум җумә хутбисида мәсчит қурушниң әһмийитини вә пәйғәмбиримизниң мәдинигә һиҗрәт қилип мәсчит қуруш тарихини тәпсилий аңлатти.

У сөзидә, бу мәсчит пәқәт намаз оқушла әмәс, бәлки шиветисйәдики уйғур пәрзәнтләрниң диний вә ана тилини өгиниши, уйғурларниң никаһ, нәзир - чирақ қатарлиқ мурасимларни елип бериш, һәр җумә намизида уйғур тилда хутибә аңлаш, рамизанда иптар зияпити бериш, һәр икки һийит намизини бирликтә оқуш қатарлиқ паалийәтләрни елип бериши үчүн сорун һазирлиғанлиқи, бу мәсчитниң қурулушиға шиветсийәдә яшаватқан уйғурларниң мадди вә мәниви җәһәттин йеқиндин ярдәмдә болғанлиқи қатарлиқларни баян қилди.

Биз мәсчитниң қурулуши вә бундин кейин қилишқа тигишлик хизмәтлири һәққидә тәпсилий мәлумат елиш үчүн, тәклимакан ислам мәдәнийәт мәркизи мәсули вә уйғур мәсчити имами өмәр мәхсумни зиярәт қилдуқ. У, шиветсийәдә мәсчит қуруш җәрянида уйғур хәлқиниң бирлик, иттипақилиқ һасил қилса һәр қандақ қийинчилиқини йеңип кетәләйдиғанлиқини һес қилғанлиқини аңлатти.

Тәклимакан ислам мәдәнийәт мәркизи баш катипи абдулла көкяр уйғур мәсчити арқилиқ, шиветсийәдики уйғурларни бирлик,иттипақлиққа йетәкләйдиған, уйғур диярдики зүлүмларни вақтида аңлитидиған мунбәр һазирлиғанлиқини билдурди.