Уйғурлар мәсилиси шветсийә мусулман җәмийәтлириниң бу йиллиқ муһакимә мунбиридин орун алди

Шветсийә парламент әзаси мәһмәт қаплан вә шветсийә уйғур маарип уюшмисиниң рәиси ниҗат турғун йиғин мәйданида. 2013-Йили 29-март, шветсийә.

Шветсийидики һәрқайси партийиләрниң мунасивәтлик хадимлири йиғин көргәзмә залидин орун алған уйғур тәшвиқат бөлүмини зиярәт қилмақта. 2013-Йили 29-март, шветсийә.

Шветсийини асас қилған скандинавийә дөләтлиридики мусулман җамаәтчиликиниң һәр йиллиқ чоң йиғилишида уйғурлар ислам дунясиниң бир парчиси болуш сүпити билән муһим орун елип кәлмәктә.

29-Марттин 31-мартқичә болған арилиқта шветсийә мусулман яшлар тәшкилати, шималий явропа ислам бирлики һәмдә ибин рушид тәлим-тәрбийә мәркизи қатарлиқ үч чоң аммиви тәшкилатниң уюштуруши билән бу йиллиқ шветсийә мусулман җәмийәтлириниң бирләшмә йиғилиши стокһолмдики әлхө көргәзмиханисида дағдуғилиқ өткүзүлди. Йиғилишқа шветсийә уйғур маарип уюшмисиму алаһидә тәклип билән қатнашти.

Бу қетимлиқ зор көләмлик йиғилишниң күнтәртипи икки мәзмундин тәшкил тапти. Бири көргәзмә залида шветсийидики һәр милләт мусулманлириниң нәччә онлиған аммиви тәшкилатлириниң тәшвиқат буюмлири көргәзмә қилинди. Йәнә бири шималий явропада яшаватқан мусулман җамаәтчиликиниң реал мәсилилири ислам дуняси вә дуня вәзийитидики қизиқ нуқтиларға бағланған һалда муһакимигә қоюлди.

Шветсийә уйғур маарип җәмийитиниң тәшвиқат орниму көргәзмә залидин алаһидә орун алди. Буниңда уйғурларниң диний вә миллий мәдәнийити, тарихи һәмдә кимликини әкс әттүридиған буюмлар көргәзмә қилинди. Рабийә ханимниң һаяти һәққидики китабниң шветчә нәшриму көргәзмидин алаһидә орун алди.

Йиғилишниң иккинчи күнидә ислам дунясидики езиливатқан милләтләр темисида мәхсус муһакимә елип берилди. Буниңда баңладаш, берма, сүрийә мусулманлири қатарида уйғур мәсилисиму муһакимә мунбиридин орун алди. Шветсийә уйғур маарип уюшмисиниң рәиси ниҗат турғун 5 кишилик муһакимә мунбиригә тәклип қилинип йиғин әһлиниң уйғурлар һәққидә сориған соаллириға нәқ мәйданда җаваб бәрди. Биз бу һәқтә тәпсилий мәлумат елиш үчүн шветсийә уйғур маарип уюшмисидин ниҗат турғун вә абдулла әпәндиләр билән сөһбәт елип бардуқ.

Тәпсилатини аваз улиништин аңлиғайсиз.