Stokholm yangratquda ezan towlashni testiqlidi

Shwétsiye téléwiziyisining xewer qilishiche, shwétsiye saqchi mehkimisi stokholmdiki fitiya rayonigha jaylashqan türk meschitining iltimasigha asasen her jüme küni jüme namizining ezan awazini sirtqa qoyuwétishke ruxset qilghan.

Fitiya rayonidiki türk meschiti yéngidin sélin'ghan, türk uslubidiki meschit bolup, 2012 - yili yanwarda jüme namizining ezan awazini sirtqa quyuwétish heqqide shwétsiye saqchi mehkimisige iltimas sun'ghan. Shwétsiye saqchi mehkimisi iltimasqa bir yildin artuq qarap chiqqandin kéyin testiq qararini alghan.

Bu xewer shwétsiyidiki eng qiziq nuqtiliq xewerning birige aylinip, pütün taratqularning hemmisidin orun alghan. Xewerde déyilishiche, meschitlerde ezan awazining sirtqa qoyuwétilishi shwétsiye tarixidiki tunji qétimliq ish bolup, bu shwétsiyide yashawatqan pütün musulmanlarni hayajan'gha salghan.

Stokholm saqchi mehkimisining mes'ul xadimi shwétsiye téléwiziyisining ziyaritini qobul qilghanda: “Biz toghra qarar chiqarduq dep oylaymiz, chünki bizning qararimiz shwétsiye we yawropa ittipaqining diniy erkinlik qanuni we pikir erkinliki qanunigha tamamen uyghun” dégen.

Biz taratqunlardin bu xewerni anglighandin kéyin, shwétsiyide yashawatqan Uyghurlarda qandaq inkaslarning bolghanliqini bilip béqish üchün shwétsiye Uyghur komitétining diniy ishlar bölümidin qurbanjanni ziyaret qilduq.

Ezan awazining sirtta yangrishi namaz qa'idilirining muhim terkibi qisimlirining biri bolup, jama'etke namaz waqtini bildürüsh we ularni namazgha chaqirishni meqset qilatti.

Uyghurlar tarixtin buyan mehelle - mehellilerdiki meschitlerde ezanni meschit munarida oqup jama'etke namaz waqtidin xewer bérip kelgen idi.

Emma, xitay hökümiti 90 - yillardin kéyin Uyghurlarning diniy étiqadigha bolghan cheklimiliklerni kücheytip, mezinlerning meschit munarlirida ezan oqushini cheklidi. Hetta meschitning sirtigha we munarlirigha ornitilghan yangratqularnmu pütünley söktürüwetken.

Xewerde bayan qilinishiche, jüme namizining ezini her jüme küni sa'et 12bilen 1ning ariliqida bolidiken.