Stokholmdiki türk jamesi munarida yangrighan ezan awazi shiwétsiyediki milletchi guruppilarning qarshiliqigha duch keldi

Bu yil 26 - apréldin étibaren stokholmning fitya rayonigha jaylashqan türk jamesining munaridin jüme namizi üchün oqulghan ezan awazi yangratqu arqiliq sirtqa biwasite anglitilidighan bolghan. Bu 500 mingdin artuq musulman ahalisige ige shiwétsiye üchünla emes, belki pütkül shimaliy yawropa elliri üchünmu tunji qétimliq yéngiliq hésablan'ghan idi.

Halbuki, bu yil may ayliridin bashlap shiwétsiyediki bir qisim milletchi guruppilar stokholmning butshürka kommunluq hökümet aldida köp qétim namayish teshkillep fitya jameside her jüme küni sirtqa yangraydighan ezan awazini chekleshni telep qilghan. Shiwétsiyening “Kündilik xewerler”, “Métro” qatarliq gézitlirining xewérlirige qarighanda, ezan awazigha qarshi namayishni “Shiwét démokratlar partiyisi” bilen “Shiwét natsistlar partiyisi” teshkilligen bolup, ular birdek shiwétsiyening köp milletlik döletke we köp medeniyetler öz - ara gireleshken jem'iyetke aylinip qélishigha qarshi turidiken, bolupmu skandinawiye elliride musulmanlar sanining künsayin éship bérishi we islam dini tesirining küchiyishidin tehdit hés qilidiken.

29 - Awghust shiwétsiye döletlik téléwiziyisining 2 - qanilida musulmanlarning ramazan éyidiki diniy pa'aliyetliri heqqide mexsus höjjetlik filim körsitilgen bolup, uningda her jüme namizida fitya jamesidin sirtqa yangraydighan ezan awazi heqqide chüshenche bérilgen.

Fitya jamesining imami ergin ependi shiwétsiye döletlik téléwiziye muxbirining ziyaritini qobul qilghanda, shiwétsiye hökümitining shimaliy yawropada tunji bolup musulmanlarning jüme namizi üchün oqulidighan ezan awazini sirtqa anglitishqa ruxset qilghanliqini tilgha alghan. U yene ezanning yéqimliq we chirayliq awazda oqulishini, anglighuchilar üchün hozur we shatliq béghishlaydighan bolushini alahide tekitligen.

Yéqinqi ehwallardin melum bolushiche, birqanche hepte ilgiri 20 yashlar chamisidiki bir yash fitya jameside del jüme namizi oquliwatqanda motosikilitning awazini eng yuqiri chekte qoyup bérip namazgha parakendichilik salghan hemde mushu herikiti arqiliq özining ezan awazigha qarshi ikenlikini bildürgen. Saqchilar neq meydan'gha yétip kélip héliqi yashni qolgha alghan. Uning adwokatining bildürüshiche, shiwétsiye soti héliqi yashqa 6 ayliq qamaq jazasi bérishi mumkin iken. Bu heqte ziyaritimizni qobul qilghan shiwétsiyidiki diniy bilim ademliridin qurbanjan mudash öz qarashlirini bayan qilip ötti.

Qurbanjan mudash ziyaritimiz jeryanida yene shiwétsiyide ezan awazi tüpeyli kélip chiqqan musulmanlar bilen shiwét milletchi guruppiliri arisidiki ziddiyetni muwapiq türde hel qilishning texirsizlikini tekitlidi.