Türkiyening qeyseri we enqere sheherliridiki Uyghurlar qurban héytni xushal-xuram ötküzmekte

Ixtiyariy muxbirimiz erkin tarim
2015.09.24
enqerede-qurban-heyt-namizi-305.jpg Enqerediki melum meschitte qurban héyt namizi ötiliwatqan körünüsh. 2012-Yili 26-öktebir, türkiye.
RFA/Erkin Tarim

Bügün, islam dunyasining eng chong héytliridin biri bolghan qurban héytning birinchi küni.

Bu yil qurban héytta türkiyede 9 kün tetil boldi. Türkiyede qurban héyt baylar üchün dem élish, chet'ellerde ékskursiye qilishqa oxshash ishlar dégenlik. Emma, awam xelq üchün bolsa islam dinidiki qurban héytining shertlirini ada qilish dégenliktur. Undaqta qurban héytini türkiyediki Uyghurlar qandaq ötküzüwatidu? bolupmu uruq-tughqanliri bilen bir mehellide jem bolup yashawatqan qeyseridiki Uyghurlar qurban héytni qandaq ötküzüwatidu? yénida héchqandaq uruq-tughqanliri bolmighan Uyghur oqughuchilar we enqerede yashawatqan Uyghurlarchu? biz chet'ellerde yashawatqan Uyghurlarning weten'ge qilghan qurban héytliq, séghinishliq otluq salimi süpitide, türkiyening enqere we qeyseri sheherliride yashawatqan Uyghurlar bilen söhbet élip barduq.

Qeyseride pa'aliyet élip bériwatqan sherqiy türkistan medeniyet we hemkarliq jem'iyiti re'isi séyit tümtürk ependi, burun kelgen Uyghurlar bilen ötken yili malayshiyadin kelgen Uyghurlar bir yerge jem bolup héyt namizi qilghanliqini, namazni Uyghur imamning qildurghanliqini, wetenni séghinish ichide birlikte, birlik ittipaqliq ichide, Uyghurlarning en'enisi boyiche qurban héyt ötküzüwatqanliqini bayan qilip ötti.

Uyghur musapirlarning perzentlirige ders bériwatqan éli ependi Uyghurlar turuwatqan qoru jaygha saxawetchi türkler we türk ammiwi teshkilatliri bügün etigende 120 etrapida qurbanliq qoy élip kélip Uyghurlargha tarqitip bergenlikini, qurbanliq göshige éghiz tegmeydighan Uyghurlarning qalmighanliqini éytti.

Biz türkiyening enqere shehiride yashawatqan Uyghurlarning héyt ötküzüsh ehwali toghrisida melumat igilesh üchün azatjan bughra ependige mikrofonimizni uzattuq.

U, gerche enqerede Uyghurlarning sani az bolsimu etigen birlikte héyt namizi qilip, birlikte qurbanliq soyup, opche héyitlishiwatqanliqini bildürdi.

1964-Yili türkiyening qeyseri shehiri exmet yesewiy mehellisige 200 a'ile Uyghur jaylashturulghan idi. Bu Uyghurlar 1960-yili ghulja, qeshqer we yeken qatarliq jaylardin afghanistan'gha chiqip, afghanistanda bir mezgil turghandin kéyin türkiye hökümiti teripidin qeyserige ekélip orunlashturulghan. 2013-2014 Yillirida bu yerge malayshiya we tayland arqiliq kelgen Uyghurlardin 1200 etrapida Uyghur jaylashturuldi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.