Türk ammiwi teshkilatliri xitay elchixanisi aldida iptar qilip naraziliq bildürdi

Türkiyediki ammiwi teshkilatlar xitayning enqere elchixanisi aldida qilghan iptardin burunqi namayishtin körünüsh. 2014-Yili iyul, enqere.

Bu hepte axiri türkiyediki ammiwi teshkilatlar xitayning enqere elchixanisi aldida yene iptar qilip, xitayning Uyghurlargha qaratqan diniy we bashqa basturush siyasetlirini eyiblidi. Teshkilatlar bayanatlirida türkiye we birleshken döletler teshkilatini Uyghur mesilisige köngül bölüshke chaqirdi.

Türk ammiwi teshkilatliri bu qétimqi ramzan éyi dawamida xitayning enqere elchixanisi aldida her ikki künde bir qétim dégüdek namayish ötküzüp, xitay hökümiti Uyghurlargha qaratqan ramzan cheklimisige naraziliq bildürüp kéliwatqan idi.

7-Ayning 18-küni ötküzülgen pa'aliyetni “Türkiye mezlumlar üchün hemkarliq teshkilati” uyushturghan bolup pa'aliyetke teshkilat ezaliri we Uyghurlarning dostliridin bolup 350 etrapida kishi qatnashti.

Kishiler iptar qilishqa yérim sa'et qalghanda xitay elchixanisi aldigha yighilip, qoligha “Xitay Uyghurlarning rozi tutushini chekligen”, “Xitayning sherqiy türkistandiki ishghali axirlashsun!”, “Sherqiy türkistan'gha erkinlik”, “Xitay sherqiy türkistandin yoqal” dégendek sho'arlar yézilghan lozunkilarni kötürgen halda turushti.

Kéyin bu pa'aliyetni uyushturghan mezlumlar uyushmisi teshkilatining mes'uli sabiq parlamént ezasi faruq ünsal ependi muxbirlargha bayanat berdi.

U bayanatida xitayning sherqiy türkistanni pütünley özining qiliwélish siyasitini Uyghurlarning étiqad erkinlikini boghush arqiliq élip bérishi siyasitini eyiblidi we birleshken döletler teshkilatini Uyghurlargha ige chiqishqa chaqirdi.