Түркийә дөләт рәиси бәргән иптар зияпитигә уйғур тәшкилатлириниң мәсуллириму тәклип қилинди

Ихтиярий мухбиримиз әркин тарим
2016.06.22
rejep-tayyip-erdoghan-iptar.JPG Рәҗәп таййип әрдоған түркийә дөләт рәиси сарийида бәргән иптарлиқ зияпитидә сөз қилмақта. 2016-Йили 21-июн, әнқәрә.
RFA/Erkin Tarim

Түркийә дөләт рәиси 6-айниң 21-күни әнқәрәниң бәштәпә районидики дөләт рәиси сарийида бәргән зияпәткә истанбулда паалийәт елип бериватқан шәрқий түркистан маарип вә һәмкарлиқ тәшкилати рәиси һидайәтуллаһ оғузхан әпәнди билән шәрқий түркистан вәхпиниң башқуруш һәйити әзаси абдуҗелил туран әпәндиму қатнашти. Мәзкур иптар зияпитигә түркийәниң 81 вилайити вә һәрқайси шәһәрлиридә паалийәт елип бериватқан аммиви тәшкилат мәсуллири, әзалири вә дөләт рәһбәрлиридин болуп 8 миң әтрапида киши қатнашти.

Иптар зияпити дөләт рәиси рәҗәп таййип әрдоғанниң ечилиш нутқи билән башланди. У алди билән меһманларниң рамизан ейини тәбрикләп мундақ деди: “аммиви тәшкилатларниң қиммәтлик вәкиллири, һөрмәтлик чоңлирим, һөрмәтлик қериндашлирим, сөйүмлүк достлар силәрни һәсрәт, муһәббәт билән чиң көңлүмдин саламлаймән. Дөләт рәиси ордисиға, милләтниң ордисиға ‏- өз өйүңләргә хуш келипсиләр. Мубарәк рамизан ейиниң йеримидин көпрәки түгиди, аста-аста рози һейитқа йеқинлишип қалдуқ, худа һәммимизни сақ-саламәт рози һейт өткүзгили несип қилсун. Аллаһ тутқан розаңларни қобул қилсун.”

Дөләт рәиси рәҗәп таййип әрдоған түркийәдики аммиви тәшкилатларниң көпиниң паалийәтлирини яхши билидиғанлиқини баян қилип мундақ деди: “бүгүнки бу иптар зияпитигә иштирак қилған аммиви тәшкилатларниң көпиниң паалийәтлирини яхши билимән. Маарип хизмәтлиридин саламәтлик хизмәтлиригичә, қанундин инсан һәқ вә һоқуқлиригичә, яш-өсмүрләргә көңүл бөлүш хизмитидин кәмбәғәлләргә ярдәм қилишқичә болған кәң саһәдә көрсәткән хизмәтлири үчүн өзүм вә миллитимгә вакалитән рәһмәт ейтимән. Түркийәдә бурун аммиви тәшкилатларни дөләткә қарши паалийәт қилидиған тәшкилат дәп көрүп, дөләт яман көрәтти. Кейинки йилларда бу уқумни йоқаттуқ, дөләт аммиви тәшкилатлар билән һәмкарлишишқа вә уларға ярдәм қилишқа башлиди. Бундин кейинму бу сияситимизгә давамлаштуримиз.”

6-Айниң 21-күни түркийә дөләт рәиси рәҗәп таййип әрдоғанниң йеңи селинған ордисида берилгән иптар зияпити ахирлашқандин кейин, бу зияпәткә тәклип бойичә иштирак қилған шәрқий түркистан маарип вә һәмкарлиқ тәшкилати рәиси һидайәтуллаһ оғузхан әпәнди билән шәрқий түркистан вәхпи башқуруш һәйити әзаси җелил туран әпәндигә микрофонимизни узаттуқ.

Һидайәтуллаһ оғузхан әпәнди хитайниң түркийәдә паалийәт елип бериватқан шәрқий түркистан аммиви тәшкилатлирини террорчи дәп әйибләватқан бүгүнки күндә, түркийә дөләт рәиси рәҗәп таййип әрдоғанниң өзлирини зияпәткә тәклип қилишиниң зор әһмийәткә игә икәнликини, бу зияпәт җәрянида дөләт рәисигә уйғурларниң салимини йәткүзүш билән биргә, түркийәдики уйғурларниң тәләп хетини тапшурғанлиқини, паалийәтниң яхши өткәнликини баян қилди.

Җелил туран әпәнди болса өзиниң шәрқий түркистан вәхпигә вакалитән иштирак қилғанлиқини, иптарниң пайдилиқ болғанлиқини ейтти.

Түркийә дөләт рәиси йеқинқи йиллардин бери һәр йили дегүдәк уйғур аммиви тәшкилатлириниң мәсуллириниму иптар зияпитигә тәклип қилмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.