Тйәнәнмен һуҗумчиси осман һәсәнниң һаят кәчмиши һәққидә мәлуматлар

Мухбиримиз шөһрәт һошур
2013-11-04
Share
beyjing-mesjit-namaz-uyghur.jpg Бейҗиңдики мәлум мәсчиттә намаз өтүватқанлар. 2013-Йили 1-ноябир.
AFP

Мәлум болушичә, осман һәсән үрүмчидә вә хитай өлкилиридә яшаш вә тиҗарәт қилиш давамида һаят тәҗрибилиригә асасән, өзини идийә вә етиқад җәһәттин йетилдүрүп маңған. Хитай өлкилиридә тиҗарәт қилип бәлгилик байлиқ топлиған болсиму, һарақ-шараб қатарлиқ кәйпи-сапа йоллиридин өзини узақ тутуп кәлгән. У 2006-йилиға кәлгәндә һидайәт йолиға техиму пухта қәдәм бесип дост вә тонуш-билишлириниң иззәт-һөрмитигә еришкән. Осман һәсәнни 2 йилниң алдида үзүмчидики бир тойда сақаллиқ вә қолида тәсви тутқан һаләттә көргән бир юртдишиниң баян қилишичә, у үрүмчидә ечиватқан пәриштә-сақал намлиқ ашханисини бу йил иккинчи айда башқа биригә сетиветип, хитай өлкилиригә кәткән; әмма аридин узун өтмәй үрүмчигә қайтип келип, таки 9-айниң бешиға қәдәр үрүмчидә турған.

Төвәндә тйәнәнмен һуҗумчиси осман һәсәнниң кәчмишлири һәққидә униң юртдашлиридин игиләнгән мәлуматларни диққитиңларға сунимиз.

Соал : ақтуниң үҗмә сақчиханисиму бу?
Хадим: шундақ!
Соал: қайси күни силәр сорақ қилған осман һәсәнниң дости вә 3-кәнт секретариниң телефони дәп бериң?
Хадим: болиду, 131....

Зияритимизни қобул қилған, осман һәсәнниң башланғучтики бәш йиллиқ савақдиши қасимҗан миҗитниң баян қилишичә, осман һәсән бала чағлирида кәпсиз, дәрсләрдә орта һал балилардин болуп у ичкиригә кирип иш-оқәт қилғандин кейин, салмақ вә салапәтлик бир кишигә айланған. Қасимҗанниң йәнә баян қилишичә, осман һәсән кишиләр болған муамилисиниң силиқ-сипайәлиқи биләнму диққәт тартқан. Осман һәсәнни 4-5 йилниң алдида "хели лобән сүпәт бопқаптикән" дәп тәриплигән қасимҗан, осман һәсәнниң абликим һәсән исимлик бир инисиниң бирқанчә йилниң алдида бир сирлиқ қатнаш вәқәсидә өлгәнликини осман һәсәнниң "иним қәсткә учриди" дәп қақшап йүргәнликини баян қилди. Әмма у османниң қәст қилди дәп кимдин гуман қилидиғанлиқидин хәвәрсизликини ейтти.

Зияритимизни қобул қилған, 3-кәнт секретари осман һәсән үстидә тохтилип, осман һәсәнниң кәмсөз еғир бесиқ бири икәнликини, хәйр-сахавәт ишлиридиму актип икәнликини ейтти.

---- Кәнтимизгә су турубиси ятқузиватқантуқ, пулимиз йетишмәй қалди, османдин пул сорап турдуқ; у иккиләнмәйла 30 миң йүәнни көтүрүп чиқти, биз униңдин 3000 йүәнни елип турдуқ. Аңлисам у мәсчиткә пул топланғанда 30 миң йүән ярдәм қипту....

Секретар бу сөзлиридин кейин осман һәсәнниң һәр қетим юртқа кәлгинидә уларни меһман қилидиғанлиқини, әмма өзиниң һарақ ичмәйдиғанлиқини, һәтта гәпкиму җиқ арилашмай, асасән гәп аңлап олтуридиғанлиқини баян қилди.

‏-‏-‏-‏- Бу йил 2-айда үрүмчигә барғантим, осман йоқлап кетәй дәп, уни сүрүштә қилдим, уни 10-йолниң ахирида телевизийә истансиниң кәйнидә бир йәрдә "пәриштә сақал"дәп бир ашхана ачти дәп аңлидим; барсам, дуканни башқа бир киши өткүзүвапту," осман ашханини бизгә сетиветип ичкиригә кирип кәтти деди; шуниң билән көрүшәлмәй қайтип кәлдим.

Секретар юқириқи сөзлиридин кейин османниң бу йил 2-айларда ашханисини сетиветип ичкиригә кирип кәткәндин кейин анчә узун өтмәй йәнә үрүмчигә қайтип чиққанлиқини ейтти. "униң өйи ақту бәнсичу(иш беҗириш орни) иди" дегән секретар ақту үҗмә йезисиниң йеңиаймақ кәнтидин үрүмчигә барған 4 кишиниң бу йил 8-айда үрүмчигә барғинида османниң өйидә меһман болғанлиқини баян қилди.

Секретарниң бу баянлиридин қариғанда, осман һәсән тйәнәнмингә һуҗум елип бериштин бир яки икки ай аввал үрүмчидә икәнлики мәлум. Осман һәсәннниң кейинки мәзгилләрдә диний етиқадиниң техиму мустәһкәмләнгәнликини арилишидиған дост-бурадәрлиригә қаритаму бир таллаш вә шаллаш елип барғанлиқини баян қилған секретар, кәнттики бирқанчә оюнчи "һарақ-шараб ичидиған" достлири бултур үрүмчигә барғинида осман һәсәнниң улардин өзини тартқанлиқини баян қилди.

---- Бизниңкиләр 2011-йили үрүмчигә бир тойға барған, османни көрүпту, осман сақал қойған вә қолида тәсви тутуп турувалған икән, бизниң ағиниләрни көрмәскә селивапту; бурун ундақ әмәсти, өзи ичмигән билән ичкәнләр билән биллә олтуратти, у 2006-йиллардин кейин пәрқлиқ бир адәмгә айланған.

Секретарниң баян қилишичә, у бир қетим юртқа кәлгинидә, ақту наһийилик сақчиханиниң муавин башлиқи мачаң дегән киши билән соқушуп қалған. Мачаң у күни мәст болуп мотсиклити билән османниң мотсиклитини соқуветип, арқидин османни тиллиған, осман сақчи башлиқи мачаңни уруп ятқузуветип, қечип кәткән. Әтиси мачаңниң чапармәнлири османни тутқуни кәлгинидә у аллиқачан ақтудин кетип болған. Мәлум болушичә бу вәқә униң юртқа қайталмаслиқиға сәвәб болған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт