Doktor erkin sidiq: islam dini Uyghurlarning milliy mewjutluqidiki eng muhim amil

Xitay hökümitining Uyghurlarning diniy erkinlikini barliq wasitiler bilen basturushi netijiside Uyghurlarning öz milliy mewjutluqni saqlap qélishta éghir sinaqlargha duch kéliwatqanliqi melum.

Uyghur tor betliridin melum bolushiche, xitayning Uyghurlargha qaratqan dinsizlashturush siyasiti netijiside kélip chiqqan Uyghurlardiki exlaq krizisi we eydizning keng yamrishi Uyghur élidiki eng chong ijtima'iy mesililerning biri iken.

Uyghur tor betliridiki inkaslarda Uyghurlar bu krizisqa taqabil turush üchün diniy kimlikini saqlap qélishqa chaqirilghan.

Emma, xitay hökümitining Uyghurlarni oz diniy kimlikini saqlaydighan her bir imkaniyettin mehrum qaldurush üchün islam eqidiliri boyiche saqal qoyup, yaghliq chigkenlerni basturupla qalmay, öymu-öy axturup “Qur'ani kerim” we “Namaz qa'idiliri” qatarliq diniy kitablarning a'ililerde bolushinimu cheklewatqanliqi, we bu kitablarni saqlighuchilarni qamaqqa éliwatqanliqi radi'o xewerlirimizdin melum.

Uyghurlar islam dinni eqidisini saqlap qalalamdu we buning Uyghur milliy kimlikini saqlap qélishta qandaq muhim ehmiyiti bar? biz bu toghrida amérikida turushluq alem qatnishi mutexessisi doktor erkin sidiq bilen söhbet ötküzduq.

Doktor erkin sidiq, yéqindin béri Uyghurlarning milliy mewjutluqini saqlap qélishi toghrisida izdiniwatqan bolup, u bu toghrida bezi maqalilerni yézip ijtima'iy alaqe torlirida élan qilghan idi.