Норвегийәдики уйғур ислам мәдәнийәт мәркизи хизмәтлирини давам қилмақта

Норвегийәдики ислам мәдәнийәт мәркизи 2012-йили 2-айда норвегийәдики мунасивәтлик тармақларниң тәстиқини елип, шу йәрдики уйғурларниң миллий вә диний кимликини сақлап қелиш мәқситидә қурулған.

Ислам мәдәнийәт мәркизи қурулғандин башлап, норвегийәдә хизмәт қилип келиватқан “уйғур комитети” билән бирликтә хизмәт елип берип, норвегийәдики уйғурларниң миллий вә диний кимликини сақлап қелиш үчүн, һәр йилидики икки һейтта уйғурларни бир йәргә җәм қилип һейт намизини оқуш, шәнбә, йәкшәнбә күнлиридики дәм елиш вақтидин пайдилинип уйғур пәрзәнтләрниң ана тил вә қуран саватини чиқиришта изчил хизмәт қилип кәлмәктә.

Биз ислам мәдәнийәт мәркизидә қандақ хизмәтләрни елип бериватқанлиқи тоғрисида тәпсилий мәлумат елиш үчүн, ислам мәдәнийәт мәркизиниң мәсули һәм уйғур мәсчитиниң имами өмәр һаҗимни зиярәт қилдуқ.

Өмәр һаҗим һазир қиливатқан оқу-оқутуш һәққидики хизмәтләр үстидә тохталди. Норвегийәдәк явропа дөләтлиридә миллий кимлик вә динини сақлап қелишта пәрзәнтләрни мәктәп йешидин башлап тәрбийиләшниң муһимлиқини алаһидә тәкитлиди.

У сөзидә, норвегийәдики уйғурларниң өзлиригә тәвә болған бир мәсчити болушиниң муһимлиқи, шуниң үчүн, норвегийәдики уйғурларни сәпәрвәр қилип бир мәсчит сетивелиш пилани барлиқи, буниңға даир хизмәтләрниң елип бериливатқанлиқи һәққидә тохталди.