Norwégiyediki Uyghur islam medeniyet merkizi xizmetlirini dawam qilmaqta

Norwégiyediki islam medeniyet merkizi 2012-yili 2-ayda norwégiyediki munasiwetlik tarmaqlarning testiqini élip, shu yerdiki Uyghurlarning milliy we diniy kimlikini saqlap qélish meqsitide qurulghan.

Islam medeniyet merkizi qurulghandin bashlap, norwégiyede xizmet qilip kéliwatqan “Uyghur komitéti” bilen birlikte xizmet élip bérip, norwégiyediki Uyghurlarning milliy we diniy kimlikini saqlap qélish üchün, her yilidiki ikki héytta Uyghurlarni bir yerge jem qilip héyt namizini oqush, shenbe, yekshenbe künliridiki dem élish waqtidin paydilinip Uyghur perzentlerning ana til we qur'an sawatini chiqirishta izchil xizmet qilip kelmekte.

Biz islam medeniyet merkizide qandaq xizmetlerni élip bériwatqanliqi toghrisida tepsiliy melumat élish üchün, islam medeniyet merkizining mes'uli hem Uyghur meschitining imami ömer hajimni ziyaret qilduq.

Ömer hajim hazir qiliwatqan oqu-oqutush heqqidiki xizmetler üstide toxtaldi. Norwégiyedek yawropa döletliride milliy kimlik we dinini saqlap qélishta perzentlerni mektep yéshidin bashlap terbiyileshning muhimliqini alahide tekitlidi.

U sözide, norwégiyediki Uyghurlarning özlirige tewe bolghan bir meschiti bolushining muhimliqi, shuning üchün, norwégiyediki Uyghurlarni seperwer qilip bir meschit sétiwélish pilani barliqi, buninggha da'ir xizmetlerning élip bériliwatqanliqi heqqide toxtaldi.