Türkiyede “Xelq'ara Uyghur tetqiqati” namliq zhurnal oqurmenliri bilen yüz körüshti

Türkiyede tunji mexsus Uyghur tetqiqati heqqidiki alte ayda bir neshr qilinidighan ilmiy zhurnal oqurmenliri bilen yüz körüshüshke bashlidi.

Tor zhurnilining tunji sanida bash tehrirning “Uyghurshunaslargha chaqiriq” namliq xitabi, proféssorr doktor alimjan inayetning “Uyghurlar shamanliri we shaman adetliri”, doktor haji qutluq qadirining “Yapon tili bilen Uyghur tili otturisidiki oxshashliqlar”, doktor es'et sulaymanning “Qeshqer neshriyatchiliqi heqqide izdinish: qeshqerde shiwit misyonérliri teripidin neshr qilin'ghan eserler” namliq maqalisi, doktor erkin sidiqning “Aldi bilen ana tilni ögitishning zörörlükining ilmiy asasliri” mawzuluq maqalisi we doktor nebijan tursunning “Mehmut qeshqirining bügünki Uyghur milletchilikige qoshqan töhpisi” namliq maqalisi, béyjing merkizi milletler uniwérsitéti oqutquchisi ilham toxti'ining “Xitayning ottura asya döletliri bilen bolghan néfit we teb'iy gaz hemkarliqini kücheytishte Uyghur rayonining istratégiyelik ornigha nezer” we béykent üniwérsitéti oqutquchisi doktor meghfiret kémal yunusoghli xanimning “Molla bilal nazim we uning dastanliri heqqide” namliq maqalisi qatarliq 9 parche maqale bésilghan. Bulardin bashqa yéngi neshr qilin'ghan kitablar tonushturulghan maqalilarmu élan qilin'ghan.

Bu maqaliler dunyaning herqaysi jayliridiki Uyghur we bashqa millet ziyaliylirining ilmiy emgiki bolup, Uyghurlarning tarixi, tili, edebiyati, ijtima'iy ehwali we siyasiy weziyitini özige singdürgen halda “Xelq'ara Uyghur tetqiqati” zhurnilining bir pütün gewdisini teshkil qilidu.

“Xelq'ara Uyghur tetqiqati” zhurnili pütün dunyadiki herqaysi millet ziyaliylirining maqalilirini élan qilidighan ilmiy zhurnal bolush süpiti bilen türkche, Uyghurche we in'gilizche üch tilda neshr qilinmaqchi. Tunji sani peqetla türk tilida neshr qilin'ghan bolup, zhurnalning qanuniy jawabkari proféssor doktor alimjan inayettin alghan uchurlargha qarighanda, zhurnalda élan qilinidighan Uyghurche maqalilerde türkiy milletler üchün tüzülgen transkiripsiyon belgisi ishlitilidiken. Bulardin bashqa Uyghurchi'ining yéngi imlasi ishlitilidiken.

Zhurnalning tehrir hey'et guruppisidikiler töwendikilerdin ibaret:

Qanuniy jawabkari proféssor alimjan inayet, bash tehrir doktor özgür ay, tehrir hey'iti doktor nur'exmet qurban, doktor erkin ekrem, doktor es'et sulayman, proféssorr doktor güler gülsewin, doktor erkin sidiq, doktor haji qutluq qadiri, doktor ilham toxti, doktor memettursun erdem, doktor meghfiret kémal yunusoghli, doktor erkin emet qatarliqlar. Biz zhurnal heqqide téximu tepsiliy melumat élish üchün zhurnalning qanuni jawabkari alimjan inayet we tehrir hey'iti ezasi meghfiret kémal xanimlar bilen söhbet élip barduq.

Zhurnalning tor bet adrési: http://www.uygurarastirmalari.com/Anasayfa.aspx