Хотән ласкуйда йәр асти диний мәктәп оқутқучиси абликим савут етиветилгән

Хитай даирилириниң уйғурларға қаратқан түрлүк бесими вә диний етиқад чәклимилири уйғурларни чүшкүнләштүрмәктә. 2009-Йили 17-июл, үрүмчи.

Аңлиғучилиримиздин кәлгән учур вә инкаслардин мәлум болушичә, хитайниң барғансери күчийиватқан диний-етиқад чәклимилири уйғурларниң диний тәлим-тәрбийә ишлирини техиму қийинлаштурмақта.

Динниң уйғурларниң миллий мәвҗутлуқи вә әркинлик күришидики ролини толуқ тонуп йәткән бир түркүм пидакар диний зиялийлар өсмүр-балиларни тәрбийиләшни кичик көләмдики йәр асти диний мәктәпләрдә давамлаштурмақта. Бу вәзийәт мана бу пидакарлар билән хитай сақчилири арисида арилап қанлиқ тоқунушларни кәлтүрүп чиқармақта. Радиомизға йеқинда кәлгән бир инкаста баян қилинишичә, хитай сақчилири 2012-йили 9-айда хотәнниң ласкуй базирида бир йәр асти диний мәктәп оқутқучисини етивәткән.

Бүгүн мухбиримизниң зияритини қобул қилған ласкуйдики бир кәнт секретари вәқәниң растлиқини, вәқәдә өлгүчиниң 35 яшлиқ абликим савут икәнликини испатлиди.

Соал: бизгә силәрниң тәвәликтә абликим савут исимлик бир кишиниң нәқ мәйданда етиветилгәнлики һәққидә бир учур кәлди, сиз абликим савутни тонумсиз?
Җаваб: тонуймән. У хотән шәһәр, ласкуй базар, бостан кәнти 2-мәһәллидин.

Соал: бу вәқә қандақ вәқә? баш-ахири қандақ болған?
Җаваб: өй тәкшүрүшкә барғанларға, пичақ көтүрүп қаршилиқ қилған, шуниңдин келип чиққан иш.

Соал: сиз абликим савутниң немиси болисиз?
Җаваб: мән һечнемиси әмәс, шу вәқә йүз бәргәндә мән шу кәнтниң секретари идим.

Соал: тәкшүрүшкә барғанларниң ичидә сизму барму?
Җаваб: мәнму бар, мән билән биллә йәнә икки кадир, кәнтниң сақчи мудириму бар.

Соал: немә үчүн, немини тәкшүрүп барған идиңлар?
Җаваб: йәр асти мәктәп ечипту дәп аңлап сүрүштә қилип барған.

Соал: ишниң ахири қандақ болди?
Җаваб: биз кәнткә елип барайли десәк, унимиди, йезидин сақчи чақирдуқ, йезидин икки ярдәмчи сақчи кәлгән, уларни ғалчи дәп тиллиди һәм пичақ көтүрүп қоғлиди, андин шәһәрдин сақчилар вә һәрбийләр келип һәрбийләр етивәтти.

Соал: қачан йүз бәргән вәқә бу?
Җаваб: 2012-йили 9-айда.

Соал: вәқә қәйәрдә йүз бәрди?
Җаваб: абликим савутниң ишикиниң алдида.

Соал: абликим савут қанчә яш иди?
Җаваб: 35-36 яшларда.

Соал: қанчә балиси бар иди?
Җаваб: үч балиси бар иди.

Юқирида хотән ласкуйда бир йәр асти диний мәктәп оқутқучисиниң етиветилгәнлики һәққидә тәпсилий хәвәр бәрдуқ.