Misirdin qaytqan oqutquchi: wetende 11 yilda sewebsiz 8 qétim qamaqta yattim

Muxbirimiz shöhret hoshur
2017.08.08
turme-uyghur-siyasiy-mehbus.jpg Türmige élip kiriliwatqan Uyghur siyasiy mehbuslar.
Social Media

Uyghur rayonida 10 yillardin buyan dawam qiliwatqan qattiq zerbe bérish heriketliride Uyghur jem'iyitidiki diniy zatlar qatlimining eng éghir zerbige uchrawatqanliqi melum.

Inkaslarda déyilishiche, zerbige uchrawatqanlar ichide xitayning siyasetlirige qarshi heriket qélishtin özini tartip yürgen yeni éhtiyat bilen yashap yürgenlermu az emes؛ shundaqtimu bular diniy zat bolup qalghanliqi üchünla her qétimliq dolqun xaraktérlik heriketlerde aylap we yillap yétishqa mejbur bolghan.

Bulardin, nöwette türkiyede yashawatqan, ilgiri wetendiki chéghida 11 yilda 8 qétim qamaqta yatqan abdulla qarajim héchqandaq délogha chétilmighanliqi üchünla da'irilerge para bérish yoli bilen hayatini qamaqtin qutquzghan.

Misirdin türkiyege qaytqan sabiq oqutquchilardin abdulla qarajim, özining 3 yilning aldida wetendin ayrilip, misirda turush imkani bolmighandin kéyin weten'ge qaytishning ornigha türkiyege kélishining sewebi üstidiki söhbitimiz dawamida, özining qamaqta yétish we qamaqtin qutulush jeryani heqqide melumat berdi.

Melum bolushiche, wetende asasliqi balilargha diniy sawat bérish bilen shughullan'ghan abdulla qarajim her qétimliq qurultay, yermenke qatarliq chong yighin we pa'aliyetler mezgilide sewebsizla tutqun qilin'ghan.

2003-Yilidin 2014-yilghiche 8 qétim tutqun qilin'ghan abdulla qarajim, 2008-yili olimpik harpisidiki tutulushida bir yilliq késilgen we olimpiktin kéyin jaza mudditi toshti dep qarilip qoyup bérilgen. Qoyup bérilishi üchün 360 ming som xejlen'gen.

Uning her qétimliq qoyup bérilishi, uning uruq-tughqan, dost-burader we yurt jama'itining da'irilerge para bérishi bilen emelge ashqan. Abdulla qarajim öz ana wetinide qanun'gha chétishliq héchqandaq bir ishqa arilashmighan teqdirdimu künige 1000 somdek pul tölep yashighanliqini ilgiri sürdi.

Ilgiri éniqlashlirimiz dawamida xitayning Uyghur rayonida 10 yillardin béri nuqtiliq a'ililikler tizimliki turghuzup, diniy zatlarni kontrol qiliwatqanliqidin bashqa yene, da'irilerning atush ishtachida 6 xil kishilerni qattiq nazaret qiliwatqanliqi, bularning ichide wezipisiz diniy zatlar we sabiq mehbuslarningmu barliqi ashkarilan'ghan idi.

Programmining tepsilatini yuqiridiki awaz ulinishidin anglighaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.