Kent sékrétari: ahalilerning diniy sawatini kimdin, qeyerde chiqirishi kéreklikini bilmeymiz

Xitay da'iriliri özining nöwettiki teshwiqat matériyallirida Uyghur rayonidiki ahalilerning diniy erkinlikke iken ikenlikini, jümlidin dinigha étiqad qilish we étiqad qilmasliq erkinliki barliqini ilgiri sürmekte. Emma höjjet we ijra'atlirida esebiylikni tügitish nami astida, Uyghurlarning eqelliy diniy melumatlarni öginish we qur'an we jaynamazni saqlishinimu cheklimekte. Undaqta da'iriler, özining teshwiqat we ijra'atidiki bu zitliqni ahalilerge néme dep chüshendürüwatidu?

Korla qarayulghundiki bir kent sékrétari bilen ötküzgen téléfon söhbitimiz dawamida, u, xitayning diniy siyaset toghruluq nöwettiki teshwiqati bilen ijra'ati arisida bir zitliq barliqini yoshuralmidi. 

U bir tereptin, nöwettiki ijra'atining waqitliq bir tedbir ikenlikini tilgha alsa, yene bir tereptin, buning “Ebediy eminlik” tin ibaret uzun mezgillik bir pilanning ijra'atliridin bir parche ikenlikini bayan qildi.

Sékrétar sözining axirida, ahalilerning yaki ularning perzentlirining eqelliy diniy sawatini, jümlidin besh waq namazning qa'idisi qatarliq sawat xaraktérlik melumatlarni kimdin we qeyerde ögense toghra bolidighanliqi heqqide özidimu bir éniq chüshenche yoqluqini ashkarilidi.

Ikki ayning aldida yopurgha we peyziwattin ehwal igiligen waqtimizda, u yerdiki da'iriler qur'ani kerimining 2012-yildin burunqi terjimisini yighiwatqanliqini ashkarilighan idi we bu heqte aptonom rayon derijilik orunlarning höjjiti barliqini éytqan idi.

Korlida nöwette diniy matériyallarning nede we qachan bésilishidin qet'iynezer hemmisiningla yighiwélin'ghanliqi melum, emma buning yalghuz korlidila ijra qiliniwatqan belgilime ikenliki we yaki aptonom rayonning burunqi höjjitide özgirish bolghanliqi melum emes.