Uyghur rayonida islamdiki 5 perzning biri - zakatning cheklen'genliki ashkarilanmaqta

Bügün ijtima'iy taratqularda “Chén chüen'goning ramizan mezgilidiki muqimliqni qoghdash yighinida sözligen sözidin bilishke tégishlik so'al-jawab” mawzuluq bir öginish matériyalining süret kopiyesi tarqaldi. Matériyalning “Ramizan mezgilidiki altini qet'iy cheklesh qaysilar?” mawzuluq qismida zakatningmu cheklinidighanliqi tilgha élin'ghan. Muxbirimiz bügün bu heqte qeshqer yéngisheherning yapchan baziridiki kent sékrétarliridin melumat soridi. Sékrétarlar zakatning cheklen'genlikini delillidi. Beziler bu chekleshning 2 yildin béri, beziler bolsa 5 yildin béri ijra qiliwatqanliqini tilgha aldi.

Ijtima'iy axbarat wasitiliride tarqalghan yuqiriqi matériyaldiki “6 Cheklesh qaysilar?” dégen so'algha, rayon atlap diniy pa'aliyet élip bérishni cheklesh, diniy wezipisi yoqlarning tepsir qilishini cheklesh, étiqadchi ammining i'ane yighishini cheklesh, zakat bérishni cheklesh, meschitlerde iptar tamiqi yéyishni cheklesh we xetme tarawini cheklesh” dep jawab bérilgen. Biz bulardin xelq'aragha téxi ashkarilanmighan-zakatning cheklen'genliki heqqidiki uchurning toghra yaki xataliqi heqqide éniqlash élip barduq. Qeshqer yéngisherning yapchan baziridiki kent sékrétarliri so'allirimizgha ochuq jawab berdi.

Diniy matériyallarda bayan qilinishiche, islamdiki besh perzning biri bolghan zakat bérish, jem'iyette ijtima'iy adaletni shekillendürüsh, iqtisadiy tengpungsizliqlarni belgilik derijide tengshesh, öz-ara hemkarliq arqiliq musulmanlar arisida qérindashliq méhrini küchlendürüshni meqset qilghan. Közetküchiler, xitay da'irilirining Uyghurlar arisida milliy birlikning küchiyip kétishining aldini élish we we hakimiyetke qarshi heriketlerni iqtisadiy menbedin ayrip tashlash üchün zakatni chekligenlikini ilgiri sürüshmekte.