Yéngidin iman éytqan yaponiyelikke Uyghur doppisi hediye qilindi

Ixtiyariy muxbirimiz qutluq
2013-10-26
Share
Yéngidin iman éytqan yaponiyelikke Uyghur doppisi hediye qilindi Yéngidin iman éytip, musulman bolghan yaponiyelikke Uyghur doppisi hediye qilindi. Musulman bolghan sétoguchi abdulla men béshigha Uyghur doppisini kiyip, özining musulman bolghanliqini dunyagha jakarlighanliqidin tolimu xushal ikenlikini bildürdi.
Photo: RFA

Yéngidin iman éytip, musulman bolghan yaponiyelikke Uyghur doppisi hediye qilindi. Musulman bolghan sétoguchi abdulla men béshigha Uyghur doppisini kiyip, özining musulman bolghanliqini dunyagha jakarlighanliqidin tolimu xushal ikenlikini bildürdi.

10-Ayning 25-küni yéngidin iman éytip musulman bolghan öy-qushliri shirkitining 42 yashliq xojayini bügün tunji jüme namizini musulmanlar bilen birlikte oqudi.

10-Ayning 17-küni fuku'oka shehiridiki “Elnur” mesjitide iman éytip musulman bolghan yaponiyelik sétoguchigha “Abdulla” dep isim qoyulghan we uninggha yaponiye islam diniy jem'iyiti musulmanliqini ispatlap guwahname bergen.

Bügün sétoguchi abdulla iman éytip musulman bolghandin kéyinki tunji jüme namizini kagoshima uniwérsitétidiki barliq musulman oqughuchi, oqutquchilar bilen birlikte oqudi

Jüme namizidin kéyin sétoguchi abdulla özining musulman bolghanliqini jama'etke we metbu'atlargha ashkarilash murasimi kagoshima uniwérsitétining xelq'ara medeniyet almashturush merkizide ötküzüldi.

Bügünki bu murasimgha yaponiye satsuma xelq'ara islam merkizi sahibxaniliq qildi. Murasimgha satsum islam merkizining re'isi kagoshima uniwérsitétining proféssori, doktor hisham ibrahim riyasetchilik qildi.

Murasimda sétoguchi abdullagha Uyghur jama'itige wakaliten Uyghur doppisi teqdim qilindi.

Béshigha yarishimliq Uyghur doppisi kiyip söz bashlighan sétoguchi abdulla metbu'atlargha we bu qétimqi murasimgha qatnashqan barliq chet'ellik musulmanlargha özining néme üchün budda dinidin waz kéchip, islam dini qobul qilghanliqi toghrisida köpchilikke söz qildi.

U sözini awwal “Qur'an kerim” diki “Süre fatihe”, “Süre ixlas” qatarliq ayetlerni yadqa oqushtin bashlap mundaq dédi: méning atam-anam we men eslide budda dinigha étiqad qilattuq. Men budda dinining eqide kalamliri toghrisidiki nomlarni, xristi'an dinidiki injilni izchil oqudum. Islam dinidiki “Qur'an kerim” ni oqughandin kéyin men “Qur'an” din ibaret bu kitabtiki möjizilerning we allaning kalamining heqiqet ikenlikini tonup yettim. We axiri islam dinini qobul qilishni layiq kördüm. Men “Qur'an kerim” ning yapon tilidiki terjimisini qayta-qayta alte ay oqudum we özümning bilishiche tetqiq qildim. Shuning bilen birge “Hedis sherif” lernimu oqudum. We shundaqla islam dinini qobul qilishni layiq taptim. Men hazir iman éytip musulman bolghanliqimdin tolimu xushalmen. Musulman qérindashlarning manga islami bilimler heqqide köprek sawaq bérishini ümid qilimen. Emma köpchilikke shuni éytip qoyushni layiq kördümki men musulman bolghuche méni héchqandaq musulman we yaki qandaqtur birer islami teshkilat méni islamgha dewet qilghini, manga islam heqqide sawat bergeni yoq. Men özlükümdin musulman bolushni qarar qilip, meschitige özüm bérip musulmanlar özüm biwasite bilen körüshtüm.

Sétoguchi abdulla murasimda köpchilikning “Siz néme sewebtin islam dinini qobul qilishni layiq kördingiz?” dégen so'aligha jawab bérip mundaq dédi: men islamdin ibaret bu dinning we musulmanlarning küch-quwwetlik, jasaretlik, ümidwar, héchnémidin qorqmas, bash egmes küchlük rohiy méni tolimu tesirlendürdi.

Kishiler uningdin yene: “Siz buningdin kéyin islam üchün néme ish qilishni pilanlawatisiz?” dep so'al sorighinida, u, bu so'algha jawab bérip mundaq dédi: men buningdin kéyin “Qur'an kerim” ni toluq ereb tilida yadlap chiqish bilen birge özümning öy-qushliri shirkitidiki yémekliklerni “Halal” yémeklik qilip ishlepchiqirishni oylishiwatimen.

Biz bu munasiwet bilen satsuma islam merkizining re'isi, kagoshima uniwérsitétining proféssor, misirliq doktor hisham ibrahimni ziyaret qilghinimizda u hayajanlan'ghan halda mundaq dédi: méning hayajanlan'ghinim, u, özi éytip ötkendek uni héchkim islamgha dewet qilghini yoq, shundaqla uning héchqandaq islam jem'iyetliri bilen körüshkinimu yoq. U, öz yüriki bilen heqiqiy tengrini tonughan. Injil, “Qur'an kerim” ni sélishturup tetqiq qilip oqughan. Uninggha bu yolni allah öz perishtiliri arqiliq biwasite körsetken yol.

Ziyaritimizni qobul qilghan tébbiy penler doktori pakistanliq muhemmed ewzel sherip bu heqte toxtilip mundaq dédi: allah uninggha toghra yolni körsetti. Men uning hayatining muweppeqiyetlik bolushigha du'a qilimen. Shundaqla kagoshimadiki musulmanlarning her jehette uninggha yardemde bolushini ümid qilimen.

Uzun yillardin béri yaponiyede yashawatqan türkiyelik refet özi ishtirak qilghan bügünki pa'aliyet heqqide toxtilip mundaq dédi: tolimu xushal boldum. Men köpligen yaponlarning musulman bolushini ümid qilimen. Bizning bu yerde islami pa'aliyet élip bérishimizdiki meqsetmu shu. Bolupmu bügün musulman bolghan bu yaponiyening béshidiki bizning qedimiy türk doppisini körüp xursen boldum.

Axirda ziyaritimizni qobul qilghan iman éytip musulman bolghan yaponiyelik sétoguchi abdulla ziyaritimizni qobul qilip mundaq dédi: men béshimgha bügün Uyghur doppisini kiyip köpchilikke özümning musulman bolghanliqimni jakarlighanliqimdin tolimu xushal.

Hazir yaponiyede islam dinining tarqilishi nahayiti tiz bolup, yaponiyede texminen ellik minggha yéqin musulman yashaydu. Yaponiyening her qaysi ölkiliride asasen meschitler bar bolup, halal yémeklikler dukinimu zor salmaqni igileydu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet