Шиветсийәдики уйғурлар яшлар тәшкилатиниң "аилә күни" намидики йиғиниға қатнашти

Ихтиярий мухбиримиз еһсан
2017-04-17
Share
aile-kuni-yighin-zali.jpg "аилә күни" намидики йиғин залидин көрүнүш. 2017-Йили 14-апрел, шиветсийә.
RFA/Éhsan

‏Шиветсийәдә һәр йили өткүзүлидиған мусулман яшлар тәшкилати, ибни рушид тәлим-тәрбийә мәркизи, шималий явропа ислам бирлики бирликтә уюштурған йиғин 14-апрелдин 16-апрелғичә шиветсийәниң пайтәхти ситокһолмдики "әлһумассан" йиғин залида рәсмий башланди.

‏Йиғин алди билән "шиветсийә мусулман яшлар тәшкилати" ниң башлиқи сөзгә чиқип йиғинға кәлгән меһманларға тәбрик сөзи қилди.

‏Мәлум болушичә, бу қетимқи 3 күнлүк йиғинға шиветсийә вә шималий явропадики дөләтләрдин тәхминән 3000 гә йеқин киши қатнашти.

‏Бу йиғинға илгирикигә охшаш ислам әллиридә көзгә көрүнгән алимлар тәклип қилинған болуп, йиғинда дунядики мусулманларниң әһвали вә явропада яшаватқан мусулманлар дуч келиватқан назук мәсилиләр вә уларни һәл қилиш чарилири һәққидә муназирә елип берилди.

Игилинишичә, мәзкур йиғинда шиветсийәдики уйғурларға вакалитән йиғинға қатнашқан уйғур маарип уюшмиси вәкиллири, илгирики йиғинларда изчил һалда уйғур мәсилиси һәққидә нутуқ сөзләп кәлгән болсиму, әмма бу йил йиғинда сөзләшкә вақит берилмигән. Бирақ улар, йиғин залидин үч үстәллик орун елип, тәшвиқат көргәзмиси паалийити елип барған. Улар көргәзмә залидики үстәлгә қойған ай юлтузлуқ көк байрақ бесилған шарпа, майка, уйғурларниң чимән допписи, әркинлик шоари бесилған шәпкә, шведчә, инглизчә вә әрәбчә тилларда бесилған тәшвиқат варақлири, уйғур дияриниң қисқичә әһвали тонуштурулған әрәбчә китаблар вә дуня уйғур қурултийиниң рәиси рабийә қадир ханим һәққидә йезилған "әҗдиһа билән елишқан аял" намлиқ шведчә китаблар йиғин иштиракчилириниң алаһидә диққитини тартқан.

Биз уйғур маарип уюшмисиниң идарә һәйәт әзаси һәмдә бу қетимлиқ көргәзмә паалийитигә мәсул хадим аббас әпәндимни зиярәт қилдуқ. У, бир қанчә йилдин бери давамлаштуруп келиватқан йиғинларда көргәзмә залидики үстәлдин үнүмлүк пайдилинип келиватқанлиқини, үстәлгә қоюлған материялларни меһманларға тарқитиш вә улар билән биваситә учришип сөһбәтлишиш арқилиқ уйғур дияриниң әһвалини шиветсийәдики мусулман аммисиға билдүрүп келиватқанлиқини билдүрди.

Аббас әпәндим бу қетимлиқ йеғинға қатнишиштики мәқсәт-нишанлири һәққидә тохталди. У, шиветсийәдики мусулман тәшкилатлириниң йиғин вә көргәзмә паалийәтлиригә актип қатнишиш арқилиқ уйғур мәсилисини шиветсийәдики һәр милләт мусулманлириға кәң даиридә чүшәндүргили, шиветсийәдики мусулман җамаитигә сиңип кирип, шиветсийәдики һәр милләт мусулманлириға, уйғур дияридики болуватқан зулумларни тәпсилий аңлатқанда буниң үнүми алаһидә болидиғанлиқини тәкитлиди. У йәнә шиветсийәдики башқа аммиви тәшкилатлар болған алақини күчәйтиш, муһаҗирәттики уйғурларниң тәшкилатлишиш һәмдә кәспий һалда тәшкилат башқурушниң муһимлиқини тәкитлиди.

Йиғин 16-април күни шу йәр вақити 20:30 да ғәлибилик аяқлашти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт