Shiwétsiyediki Uyghurlar yashlar teshkilatining "A'ile küni" namidiki yighinigha qatnashti

Ixtiyariy muxbirimiz éhsan
2017-04-17
Share
aile-kuni-yighin-zali.jpg "A'ile küni" namidiki yighin zalidin körünüsh. 2017-Yili 14-aprél, shiwétsiye.
RFA/Éhsan

‏Shiwétsiyede her yili ötküzülidighan musulman yashlar teshkilati, ibni rushid telim-terbiye merkizi, shimaliy yawropa islam birliki birlikte uyushturghan yighin 14-apréldin 16-aprélghiche shiwétsiyening paytexti sitokholmdiki "Elhumassan" yighin zalida resmiy bashlandi.

‏Yighin aldi bilen "Shiwétsiye musulman yashlar teshkilati" ning bashliqi sözge chiqip yighin'gha kelgen méhmanlargha tebrik sözi qildi.

‏Melum bolushiche, bu qétimqi 3 künlük yighin'gha shiwétsiye we shimaliy yawropadiki döletlerdin texminen 3000 ge yéqin kishi qatnashti.

‏Bu yighin'gha ilgirikige oxshash islam elliride közge körün'gen alimlar teklip qilin'ghan bolup, yighinda dunyadiki musulmanlarning ehwali we yawropada yashawatqan musulmanlar duch kéliwatqan nazuk mesililer we ularni hel qilish chariliri heqqide munazire élip bérildi.

Igilinishiche, mezkur yighinda shiwétsiyediki Uyghurlargha wakaliten yighin'gha qatnashqan Uyghur ma'arip uyushmisi wekilliri, ilgiriki yighinlarda izchil halda Uyghur mesilisi heqqide nutuq sözlep kelgen bolsimu, emma bu yil yighinda sözleshke waqit bérilmigen. Biraq ular, yighin zalidin üch üstellik orun élip, teshwiqat körgezmisi pa'aliyiti élip barghan. Ular körgezme zalidiki üstelge qoyghan ay yultuzluq kök bayraq bésilghan sharpa, mayka, Uyghurlarning chimen doppisi, erkinlik sho'ari bésilghan shepke, shwédche, in'glizche we erebche tillarda bésilghan teshwiqat waraqliri, Uyghur diyarining qisqiche ehwali tonushturulghan erebche kitablar we dunya Uyghur qurultiyining re'isi rabiye qadir xanim heqqide yézilghan "Ejdiha bilen élishqan ayal" namliq shwédche kitablar yighin ishtirakchilirining alahide diqqitini tartqan.

Biz Uyghur ma'arip uyushmisining idare hey'et ezasi hemde bu qétimliq körgezme pa'aliyitige mes'ul xadim abbas ependimni ziyaret qilduq. U, bir qanche yildin béri dawamlashturup kéliwatqan yighinlarda körgezme zalidiki üsteldin ünümlük paydilinip kéliwatqanliqini, üstelge qoyulghan matériyallarni méhmanlargha tarqitish we ular bilen biwasite uchriship söhbetlishish arqiliq Uyghur diyarining ehwalini shiwétsiyediki musulman ammisigha bildürüp kéliwatqanliqini bildürdi.

Abbas ependim bu qétimliq yéghin'gha qatnishishtiki meqset-nishanliri heqqide toxtaldi. U, shiwétsiyediki musulman teshkilatlirining yighin we körgezme pa'aliyetlirige aktip qatnishish arqiliq Uyghur mesilisini shiwétsiyediki her millet musulmanlirigha keng da'iride chüshendürgili, shiwétsiyediki musulman jama'itige singip kirip, shiwétsiyediki her millet musulmanlirigha, Uyghur diyaridiki boluwatqan zulumlarni tepsiliy anglatqanda buning ünümi alahide bolidighanliqini tekitlidi. U yene shiwétsiyediki bashqa ammiwi teshkilatlar bolghan alaqini kücheytish, muhajirettiki Uyghurlarning teshkilatlishish hemde kespiy halda teshkilat bashqurushning muhimliqini tekitlidi.

Yighin 16-april küni shu yer waqiti 20:30 da ghelibilik ayaqlashti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.