Qoshnisining jédilini ayrighan zeytunxan isma'il diniy esebiylik gumani bilen lagérgha ekétilgen

Muxbirimiz shöhret hoshur
2021-05-20
Share
lager-turpan-xalmurat-uyghur.jpg Turpan'gha sélin'ghan melum "Qayta terbiyelesh merkizi".
Social Media

Orun: turpanning chatqal yézisi, waqit: 2020 ‏-yili 1-ay؛ 67 yashliq zeytunxan isma'il qoshna a'ilidin chiqiwatqan ensiz awazni anglap öyidin chiqidu we qoshnisining öyige kirip, éghir'ayagh ayali bilen jédellishiwatqan mest erge nesihet qilidu we jédel bésiqidu. Melum bolushiche, bu ishtin qoshnisi razi, özi razi, mehelle koy razi؛ emma da'iriler razi emes؛ shunga saqchilar zeytunxan isma'ilni bir yil burunqi bu ish seweblik, diniy esebiylik gumani bilen, buningdin 4 ay awwal béshigha qara xalta kiydürüp lagérgha élip kétidu. Töwende muxbirimiz shöhret hoshurning bu heqte teyyarlighan programmisi diqqitinglarda bolidu.

Turpan'gha qarita élip barghan téléfon ziyaretlirimiz dawamida, chatqal yéza saqchixanisida xizmet qiliwatqan bir xadim, özi mes'ul kenttin yéqinda tutulghanlar arisida, zeytunxan isma'il isimlik 67 yashliq bir ayalningmu barliqi, uning mest qoshnisining jédilini ayrighanliqi üchün diniy esebiylik gumani bilen tutulghanliqini ashkarilidi. Melum bolushiche, zeytunxan isma'il mehellidiki yurt chongi anilardin biri bolup؛ u yillardin béri mehellining toy-tökün, ölüm yétim ishlirigha yétekchilik qilip kelgeniken. Yillardin béri uning bu pa'aliyetliri seweblik jem'iyet tinchliqi we muqimliq üchün töhpe qoshush dep qarilip kent ahaliler komitétining righbetlendürüshige ériship kelgeniken. Zeytunxan isma'il, bu nöwette qoshnisining öyidiki jédelni anglighinida, burunqigha oxshashla yurt chongiliq hem qoshnidarchiliq mes'uliyet tuyghusi bilen majiragha arilashqan. Emma bu qétim da'iriler uning bu qilghinini, yeni mest qoshnishisini bolsa haraqni ichmeslik, bolmighanda az ichishke buyrushi, mehelle tinchiliqi üchün xizmet qilish emes belki kishilerni haraqtin tosush dep qarighan we bu haraqtin tosush diniy esebiylikning alamiti dep békitilgen.

Ilgiriki éniqlashlirimiz dawamida, yéngisarda 70 nechche yashliq bir kishi 13 yilning aldida özining mest oghlini eyibligenliki yeni haraqtin tosqanliqi üchün diniy esebiylik bilen eyiblen'gen we 10 yilliq késiwétilgenidi. 2016‏-Yili xotende bir kent kadiri bir diniy zatning aldida chékiwatqan tamakisini yoshurghanliqi üchün, dini esebiylikke qarshi meydani qet'iy bolmasliq bilen eyiblinip wezipisidin élip tashlan'ghan we bu weqe xitayning öz axbarat wasitiliri arqiliq xelq'ara axbaratqa tarqalghanidi.

Mezkur alaqidar xadimning bayan qilishiche, zeytunxan isma'il, yene mehellidiki tejribilik méyit yuyghuchi ayallardin bolup, u bu xizmiti seweblikmu ilgiri da'irilerning righbetlendürüshige ériship kelgeniken؛ emma bu qétimqi tutulushida, uning méyit yuyush ishi seweblik soraqqa tartilip tartilmighanliqi hazirche melum emes.

Yuqirida, turpan chatqalda 67 yashliq zeytunxan isma'il isimlik ayalning mest qoshnisini haraqtin tosqanliqi üchün diniy esebiylik bilen eyiblinip lagérgha solan'ghanliqi heqqide melumat berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet