Diniy mu'ellime xasiyetning qur'anni tiqiwalghanliqi qoshulup 14 yilliq késiwétilgenliki delillendi

Muxbirimiz shöhret hoshur
2022-01-05
Share
Tutqundiki pénsiyonér niyaz nasirning lagérdin jesiti chiqqan Watikan shehirining ikki hessisi bilen teng, 10,000 jinayetchi sighidighan ürümchi 3-türmisining aldi körünüshi. 2021-Yili 23-aprél.
AP

Manasliq diniy mu'ellime xasiyet exmetning tutqunda ikenliki toghruluq xewirimiz bérilgendin kéyin, anglighuchilardin biri radiyomizgha uchur yollap, xasiyetning 14 yilliq késilip bolghanliqini, shundaqla délogha mes'ul xadimning kimlikini melum qildi. Muxbirimizning bu uchurni alghandin kéyin ilgirilep élip barghan éniqlashliri dawamida, uning 14 yilliq késilishige, bala oqutushtin bashqa, saqchilar qur'anni yighiwatghan mezgilde ikki qur'anni tiqiwalghanliqiningmu seweb bolghanliqi aydinglashti.

Töwende muxbirimiz shöhret hoshurning bu heqte teyyarlighan programma misi diqqitinglarda bolidu.

Weziyettin xewerdar, ismini ashkarilashni xalimaydighan kishining inkas qilishiche, xasiyetning tutqun qilinishigha uning bala oqutushidin bashqa, 2016 ‏-yili da'iriler manasta “Qanunsiz diniy matériyallar” ni yighiwéliwatqan mezgilide a'iliside qur'ani kérimdin ikkini tiqiwalghanliqimu seweb bolghan. Déyilishiche, uning bala oqutushigha 7 yilliq we qur'anni tiqiwalghinigha 7 yilliq bolup jem'iy 14 yilliq késiwétilgen. Biz xasiyet exmetning ehwali heqqide bu yéngi tepsilatlarni anglighandin kéyin manas nahiyesidiki saqchi organlargha qaytidin téléfon qilduq.

Inkasta, xasiyet exmetning délosini ishleshke bazarliq saqchixanining siyasiy yétekchisi jür'et isimlik birsining hemkarlashqanliqi qeyt qilin'ghanidi. Biz mezkur saqchi xadimi bilen sözlishish pursitige érishken bolsaqmu, u xadim özining xasiyetning délosini ishleshke hemkarlashqanliqini ret qildi, hetta uni tonumaydighanliqini bayan qildi.

Inkasta yene déyilishiche, xasiyet exmet üstdin mexsus sot échilmighan, peqet bir sot hökümnamisi uning a'ile--tawabi'atigha tutquzulghan. Hökümnamide jaza mudditidin bashqa, tutulush sewebimu qisqiche bayan qilin'ghan. Manas nahiyelik sot mehkimisining bir xadimi, xasiyet exmetning 14 yilliq késilgenlikini delillesh bilen birlikte, uning késilish sewebliridin birining ikki dane qur'ani kérimni tiqiwalghanliqi ikenlikinimu ashkarilidi.

Ötken qétimliq éniqlashlirimizdin ashkarilinishiche, xasiyet exmetning yoldishi 9 yil awwal bölgünchilik bilen eyiblinip muddetsiz késilip ketken, ata-anisi tügep ketken we 13 yashliq bir qizining nede ikenliki melum emes idi. Shunga mezkur sot hökümining xasiyet exmetning yoldishi terep uruq-tughqanlirigha bérilgenliki éhtimalgha yéqin körülmekte.

Yene ötken qétimliq éniqlishimizda, bir inkaschi xasiyet exmetning yérim kéchide öyidin tutup kétilgenlikini melum qilghan bolsa, bir ahaliler komitéti mudiri, xasiyetning bir guruppa kishiler bilen birlikte saqchixanigha tekshürüshke apirilghanliqi we so'al-soraqtin kéyin tutup qélin'ghanliqini melum qilghanidi. Bu qétimqi éniqlishimizda, uning deslepte 2017-yili 5 ‏-ayda bir qétim 15 kün tutup qoyup bérilgenliki we kéyinki 9 ‏-ayda tutulghanda késiwétilgenliki ashkarilandi.

Yuqirida manastiki diniy mu'ellime xasiyet exmetning bala oqutqanliqi üchün 7 yilliq, qur'ani kérimni tiqiwaghanliqi üchün 7yilliq bolup 14 yilliq késilgenliki heqqide anglitish berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet