Manasta bala oqutqan diniy mu'ellime xasiyet exmet xanimning tutqunda ikenliki delillendi

Melum boloshiche, manas nahiye baziri ichide olturushluq xasiyet exmet xanim 2017 ‏-yili 5 ‏-ayda yérim kéchide öyidin tutup kétilgen we ta hazirghiche héchqandaq iz-dériki bolmighan. Weziyettin xewerdar kishining radiyomizgha inkas qilishiche, xasiyet xanim tutulushtin 9 yil awwal, uning yoldishi “Bölgünchilik” bilen eyiblinip, muddetsiz késilip ketken. Uning özining tutulushigha mehellidiki ösmür balilargha diniy ders bergenliki seweb bolghan iken. Muxbirimizning téléfonini qobul qilghan manastiki saqchi xadimliri diniy mu'ellime xasiyet exmet xanimning tutqunda ikenlikini delillidi.

Weziyettin xewerdar kishining radiyomizgha inkas qilishiche, manas nahiye bazirida olturushluq xasiyet exmet xanim yoldishi2009 ‏-yili mudddetsiz késilip ketkendin kéyin, bala oqutush ishliri bilen meniwiy dunyasidiki boshluqni toldurup kelgen. Uning oqutush ishliri ösmür balilarning qur'an sawadini chiqirish we milliy örp-adetler boyiche yashashni ögitishtin ibaret bolghan. U bu qilghanliri seweblik2017 ‏-yili 5‏-ayda tutqun qilin'ghan we ta hazirghiche iz-dériki ghayib bolghan.

Biz aldi bilen manas nahiyelik saqchi idarisigha téléfon qilip, xasiyet exmetning ehwali heqqide melumat soriduq. Xadimlar manasta Uyghurlarning sanining az ikenliki, Uyghur saqchi xadimliriningmu yoq déyerlik ikenlikini bildürüp, so'allirimizgha jawap bérishni ret qildi.

Weziyettin xewerdar kishining bildürishiche, saqchilar xasiyet exmetni élip mangghan küni ularning öyige ishikini chéqip bésip kirgen we uning milliy örp-adetler boyiche kéyinip méngishighimu yol qoymay, béshigha qara xalta kiydürüp élip mangghan. Inkasta déyilishiche, xasiyet exmet xanim manas bazar ichidiki üchinji saqchi ponkiti xadimliri teripidin tutqun qilin'ghan. Xadimlar3 ‏-ponkitning alaqe uchuri heqqidiki so'allirimizghimu jawap bermidi.

Melum bolushiche, xasiyet exmet1964 ‏-yili tughulghan, yoldishi muddetsiz késilip ketkendin kéyin, a'iliside bir qizi bilen yalghuz qalghan. Ata-anisi tügep ketken we qérindashliri yénida bolmighachqa, uning östige u yéqin ötken, yeni balilirini uningda oqutqan kishilerning hemmisi tutqun qilin'ghan bolghachqa, u tutup kétilgendin kéyin, uning iz-dérikini qilidighan kishiler qalmighan. Yéqinda jem'iyette uning 14 yilliq késilgenliki heqqide gep-sözler tarqalghan bolsimu, emma bu uchurning kimler teripidin kimlerge yetküzülgenliki melum emes iken.

Téléfonimizni qobul qilghan saqchilardin biri, xasiyet exmetning qanche yil késilgenliki heqqidiki so'alimizgha jawaben, bu ishning “Dölet mexpiyetiliki” ikenlikini tekitlidi, emma uning tutqunda ikenlikini ret qilmidi.

Inkas qilinishiche, xasiyet exmet tutqun qilinishtin ikki yilche awwal salametlikide mesile körülüp, öyide xalisane bala oqutushnimu toxtatqan we ijtima'iy pa'aliyet so'unliridinmu uzaq turuwatqan iken. Déyilishiche, xasiyet exmet öyidin élip méngilghan küni, saqchilar uning adette yénidin ayrimaydighan dorilirini éliwélishigha ruxset qilmighan. Xasiyet exmetning tutulushtin awwal doxturxanida tekshürülgen yaki tekshürülmigenliki, tutqundiki mezgilide salametlikide qandaq özgirishlerning bolghanliqi melum emes.

Téléfonimizni qobul qilghan manas bazarliq saqchi xadimi bizning xasiyet exmetning délo arxipigha qarap béqish telipimizge jawaben, aldi bilen bizdin xasiyet exmetning kimlik nomurini soridi. Bu saqchi xadimi biz dep bergen kimlik nomurigha asasen arxip axturup, xasiyet exmetning délosini ashkarilashqa bolmaydighanliqini bayan qilish arqiliq, uning nöwette tutqunda ikenlikini delillidi.

Xasiyet exmet olturushluq ahaliler kométitining bir amanliq xadimi, öz tewelikidin bir türküm kishilerni2017 ‏-yilining otturilirida saqchixanigha tapshurup bergenliki, bularning ichidiki xasiyet exmet qatarliq 4 kishining so'al-soraqtin kéyin tutup qélin'ghanliqi we shundin béri a'ilisige qaytmighanliqini ashkarilidi.

Inkasta yene eskertilishiche, xasiyet exmet tutulghan waqitta 13 yashliq qizi bilen birge yashawatqan bolup, awwal dadisi, andin anisidin ayrilip qalghan bu qizning nöwettiki teqdiri melum emes iken.