Dunya Uyghur qurultiyi dolqun eysaning inisining muddetsiz késilgenlikini qattiq eyiblidi

Dunya Uyghur qurultiyi bayanat élan qilip, dunya Uyghur qurultiyining re'isi dolqun eysaning inisi xushtar eysaning muddetsiz késilgenlikini qattiq eyiblidi. Xitay hökümitining xushtar eysani atalmish “Térrorluqqa teyyarliq qilish” qatarliq jinayetler bilen muddetsiz qamaq jazasigha höküm qilghanliqi erkin asiya radiyosi teripidin delillen'gen idi.

Melum bolushiche, xushtar eysa 1996-yili shi'endiki qatnash uniwérsitétini püttürgendin kéyin, akisi dolqun eysaning “Siyasiy mesilisi” tüpeyli xizmet tépishta qiynalghan. U, 1998-yili bir qétim tutqun qilinip ékki yil késilgen. Kéyin u öz aldigha réstoran échip tériqchilik qilghan, andin aqsudiki bir shopurluq mektipide oqutquchi bolghan.

Xushtar eysa 2017-yili qolgha élinip, lagérgha tashlan'ghan. Shuningdin kéyin dolqun eysa inisining nede ikenlikidin xewer alalmighan.

Radiyomizning bu heqtiki so'allirigha jawab bergen yerlik saqchi xadimliri xushtar eysaning lagérda ikki yil tutup turulghandin kéyin “Térrorluqqa teyyarliq qilish” qatarliq jinayetler bilen muddetsiz késilgenlikini bildürgen idi.

D u q ning bayanatida neqil élishiche, dolqun eysa inisining gunahsiz ikenlikini bildürüp mundaq dégen: “Bu méning uda üch yil mushundaq kishini échinduridighan xewerlerni tapshuruwélishim. Tunji qétim anamning 2019-yili lagérda qaza qilghanliqini, 2020-yili dadamning qaza qilghanliqini uqtum. Mana hazir 2021-yili inimning ömürlük késilgenlikini bildim. Xitay hökümiti görüge élish diplomatiyesidin paydilinip méni we Uyghurlarni jimiqturmaqchi boluwatidu.”

Bayanatta körsitishiche, xitay hökümiti 2016-yili Uyghur rayonida “Qattiq zerbe bérish herikiti” ni bashlighandin buyan 250 mingdin artuq shexske jaza höküm qilghan.

D u q bayanatining axirida xelq'ara jem'iyetni bu xil qilmishlarni eyibleshke we xelq'ara qanun we prinsiplargha éghir xilapliq qilghanliqi üchün xitayni jawabkarliqqa tartishqa chaqiridi.