Долқун әйса: "бу йил барин инқилабиниң 30 йиллиқини қәлбимиздә хатириләймиз"

Ихтиярий мухбиримиз әкрәм
2020-04-03
Share
germaniye-namayish-dolqun.jpg Хитай консулханиси алдида өткүзүлгән хитайға қарши намайиш. 2013-Йили 5-апрел, мюнхен.
RFA/Ekrem

Муһаҗирәттики уйғурларниң "барин инқилаби" ниң 30 йиллиқини намайиш билән хатириләш паалийәтлири омумйүзлүк әмәлдин қалдурулди.

Дуня уйғур қурултийи 3-апрел күни ахбарат елан қилип корона вируси сәвәблик дуняниң һәрқайси җайлиридики уйғурларниң "барин инқилаби" ниң 30 йиллиқини намайиш билән хатириләш паалийәтлириниң бирдәк әмәлдин қалдурулғанлиқини билдүрди.

Ахбаратта "дуня уйғур қурултийи болуш сүпитимиз билән барин инқилабиниң 30 йиллиқини пүтүн дуня миқясида кәң көләмдә хатириләшни пилан қилған идуқ. Әпсуски, хитайниң вухән шәһиридин дуняға ямриған корона вируси сәвәбидин бу йил тунҗи қетим барин инқилабини коллектип һалда хатириләштин мәһрум қалдуқ. Бу хил трагедийә һәммимизниң йүрикини чоңқур азаблайду!" дейилгән. Ахбаратта йәнә барин инқилаби тоғрисида тохтилип, мундақ дейилгән: "һәммимизгә мәлум болғинидәк, вәтинимиз шәрқий түркистанниң барин йезисида 1990-йили 4-айниң 5-күни зәйдин йүсүп башчилиқидики вәтәнпәрвәр оғланлиримиз хитай коммунист һакимийитиниң хәлқимизгә селиватқан дәһшәтлик еғир зулуми, сиясий бесими, ирқий кәмситиши, миллий вә диний җәһәттики йоқитиш сияситигә қарши қозғилип, уйғур хәлқиниң вә җәңгивар әҗдадлиримизниң зулумға вә мустәмликичиләргә тиз пүкмәйдиған күрәшчан роһини намаян қилған иди."

Ахбаратта йәнә "барин инқилаби, вәтинимиз шәрқий түркистанда хитай мустәбитлириниң фашистлиқ һөкүмранлиқини ағдуруп ташлап, шәрқий түркистан хәлқиниң әркинлики, мустәқиллиқини қолға кәлтүрүш ғайиси билән оттуриға чиққан шанлиқ бир инқилаб иди. Шундин буян барин инқилаби уйғур мустәқиллиқ һәрикитиниң илһам мәнбәсигә айланди. Шәрқий түркистан хәлқиниң әркинлик ирадисиниң мәңгү сунмайдиғанлиқини дуняға җакарлиди," дейилгән.

Д у қ рәиси долқун әйса әпәнди бу һәқтә тохталғанда дуняға апәт болуватқан корона вирусиниң д у қ ниң нурғунлиған паалийәтлирини әмәлдин қалдурушиға сәвәб болғанлиқини әскәртти. У сөзидә муһаҗирәттики уйғурларниң бу йил барин инқилабини қәлбидә хатириләйдиғанлиқини тилға алди.

Д у қ ниң муавин рәиси пәрһат муһәммиди әпәнди муһаҗирәттики уйғурларниң 30 йилдин буян тунҗи қетим барин инқилабини түрлүк шәкилләрдә хатириләш паалийитини өткүзүштин мәһрум қалғанлиқини баян қилди.

Германийәниң мюнхен шәһиридики "явропа шәрқий түркистан бирлики" һәр йили барин инқилабини хатириләш намайиши өткүзүшни адәткә айландурған болуп, мәзкур тәшкилатниң рәиси әсқәрҗан әпәнди бу йил корона вируси сәвәблик бу намайишни өткүзәлмәйдиғанлиқини тәкитлиди.

Барин инқилабини һәр йилқи хатирә күнлиридә шәһәр мәркизидә мәхсус гүлчәмбирәк тизип өзгичә усулда хатириләп кәлгән голландийәниң роттердам шәһиридики уйғур зиялийси зәйнидин әпәндиму бу йил бу паалийәтни өткүзүштин мәһрум қалған.

Йиллардин буян барин инқилабини хатириләш намайишини изчил давамлаштуруп кәлгән норвегийә уйғур комитетиму бу йил корона вируси сәвәблик пайтәхт ослода өткүзмәкчи болған зор намайишни бикар қилған. Мәзкур тәшкилатниң рәиси бәхтияр өмәр әпәнди бу һәқтә қарашлирини изһар қилип өтти.

Д у қ 3-апрел елан қилған ахбаратини "барин инқилаби бүгүнки заман тарихимиздики миллий күришимизниң илһам булиқи, уйғур хәлқи бу шанлиқ күрәш дастанини әбәдий иптихарлиниш туйғуси ичидә яд етиду вә зәйдин йүсүп башчилиқидики әзиз шеһитлиримизниң күрәш ирадисигә садиқлиқ билән варислиқ қилиду!" дегән җүмлә билән ахирлаштурған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт