Д у қ рәиси долқун әйса венада өткүзүлгән иптарда мусулман дөләтлирини һәрикәткә өтүшкә чақирди

Ихтиярий мухбиримиз әркин тарим
2022-04-25
Share
Д у қ рәиси долқун әйса венада өткүзүлгән иптарда мусулман дөләтлирини һәрикәткә өтүшкә чақирди Австрийә пайтәхти вена шәһиридә өткүзүлгән иптар паалийитигә д у қ ниң рәиси долқун әйса әпәнди сөз қилмақта. 2022-Йили 21-апрел.
RFA/Erkin Tarim

Д у қ 23-апрел күни германийәниң мюнхен шәһиридә өткүзгән иптар паалийитигә уйғур аммиви тәшкилатлири мәсуллири, сиясәтчиләр, дукандарлар вә уйғур җамаәт әрбаблири иштирак қилған. Мәзкур паалийәткә д у қ ниң рәиси долқун әйса әпәнди башчилиқидики д у қ рәһбәрлири қатнашқан. Иптарда долқун әйса әпәнди сөз қилип, германийәниң көлн шәһири билән австрийәниң вена шәһиридә түрк вә мусулман аммиви тәшкилат мәсуллирини тәклип қилип өткүзүлгән иптар паалийити һәққидә мәлумат бәргәндин сирт, д у қ нөвәттә чиң тутуп қилидиған хизмәтләр тоғрисида музакирә елип берилған. Д у қ рәиси долқун әйса әпәнди бу һәқтики зияритимизни қобул қилип, қисқичә мәлумат бәрди.

Д у қ бу йил явропа дөләтлиридики түрк вә мусулман тәшкилатлири мәсуллирини иптар зияпитигә тәклип қилип, улар билән болған һәмкарлиқни күчәйтиш мәқситидә бир қатар паалийәтләрни елип беришни қарар қилған. Д у қ намида 4-айниң 21-күни австрийә пайтәхти вена шәһиридә өткүзүлгән иптар паалийитигә д у қ ниң рәиси долқун әйса әпәнди башчилиқидики д у қ рәһбәрлири қатнашқан. Иптарда долқун әйса әпәнди сөз қилип, уйғурларниң һазирқи еғир вәзийити дунядики һәр қайси дөләтләрниң уйғур мәсилисигә болған позитсийәси тоғрисида мәлумат бәргәндин кейин ислам дөләтлирини уйғур мәсилисигә қарита сүкүтини бузушқа чақирған.

Австрийә пайтәхти вена шәһиридә өткүзүлгән иптар паалийитидин көрүнүш. 2022-Йили 21-апрел.
Австрийә пайтәхти вена шәһиридә өткүзүлгән иптар паалийитидин көрүнүш. 2022-Йили 21-апрел.
RFA/Erkin Tarim

Бу, австрийәдә дуня уйғур қурултийи билән австрийә уйғур җәмийити бәргән тунҗи қетимлиқ иптар һесаблинидикән. Мәзкур иптар паалийити тоғрисида телефон зияритимизни қобул қилған д у қ рәиси долқун әйса әпәнди, явропадики түрк вә мусулман аммиви тәшкилатлириға иптар зияпити уюштуруштики мәқсити һәққидә тохтилип мундақ деди: “бир қанчә йилдин буян дуня уйғур қурултийиниң ислам дунясиға қарита паалийәтләрни күчәйтиш хизмәт пилани бар. ‛уйғур ирқий қирғинчилиқи‚ға қарита мусулман дөләтлириниң җим турувелиши, бешини ичигә тиқивелиши, һәтта бу мәсилидә хитайниң йенида туруши бизни биарам қиливатқан мәсилиләрдин бири. Шуңа биз дуня уйғур қурултийи бу һәқтә паалийәтлиримизни күчәйтишкә тиришиватимиз. Буни әмәлгә ашуруш үчүн рамизан ейи яхши бир пурсәт. Чүнки явропада нурғун түрк аммиви тәшкилатлири бар. Бу тәшкилатларниң өз дөлитидики һөкүмәт, сиясий партийәләр вә аммиви тәшкилатлар билән йеқин алақилири бар. Уйғур ирқий қирғинчилиқиға қарита ислам дөләтлирини һәрикәткә өткүзүш үчүн явропадики мусулман аммиви тәшкилатлар билән мунасивитимизни күчәйтишкә тиришиватимиз. Мәсилән германийәдә 3 милйондин артуқ түрк яшайду. Башқа явропа дөләтлиридиму түркләр наһайити көп. Шуңа рамизан ейида явропа дөләтлиридә иптар паалийәтлири өткүзүватимиз”.

Д у қ диний ишлар комитети рәиси турғунҗан алавуддин әпәнди 21-апрел күни австрийәдә өткүзүлгән иптар паалийитидә долқун әйса әпәндиниң доклат берип, ‛уйғур ирқий қирғинчилиқи‚ тоғрисида мәлумат бәргәнликини, буни аңлиған йиғин әһлиниң уйғурларни қоллайдиғанлиқини ипадиләшкәнликини оттуриға қойди.

Д у қ рәиси долқун әйсаниң билдүрүшичә германийәниң көлн шәһири мусулман, христиан вә йәһудий динидин болған аммиви тәшкилатлар әң көп җайлашқан шәһәр икән. Шуңа д у қ 15-апрел күни тунҗи қетимлиқ иптар паалийитини германийәниң көлн шәһиридә өткүзгән. У, көлн шәһиридә өткүзүлгән иптар паалийитигә охшимайдиған динларға мәнсуп аммиви тәшкилатларниң мәсуллириниң иштирак қилғанлиқини, мувәппәқийәтлик өткүзүлгәнликини тәкитлиди.

Игилишимизчә явропадики түрк вә ислам аммиви тәшкилат мәсуллириға иптар бериш паалийити алдимиздики күнләрдә мюнхен шәһиридә өткүзүлидиған иптар паалийити билән йәнә давамлишидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт