D u q re'isi dolqun eysa wénada ötküzülgen iptarda musulman döletlirini heriketke ötüshke chaqirdi

Ixtiyariy muxbirimiz erkin tarim
2022-04-25
Share
D u q re'isi dolqun eysa wénada ötküzülgen iptarda musulman döletlirini heriketke ötüshke chaqirdi Awstriye paytexti wéna shehiride ötküzülgen iptar pa'aliyitige d u q ning re'isi dolqun eysa ependi söz qilmaqta. 2022-Yili 21-aprél.
RFA/Erkin Tarim

D u q 23-aprél küni gérmaniyening myunxén shehiride ötküzgen iptar pa'aliyitige Uyghur ammiwi teshkilatliri mes'ulliri, siyasetchiler, dukandarlar we Uyghur jama'et erbabliri ishtirak qilghan. Mezkur pa'aliyetke d u q ning re'isi dolqun eysa ependi bashchiliqidiki d u q rehberliri qatnashqan. Iptarda dolqun eysa ependi söz qilip, gérmaniyening köln shehiri bilen awstriyening wéna shehiride türk we musulman ammiwi teshkilat mes'ullirini teklip qilip ötküzülgen iptar pa'aliyiti heqqide melumat bergendin sirt, d u q nöwette ching tutup qilidighan xizmetler toghrisida muzakire élip bérilghan. D u q re'isi dolqun eysa ependi bu heqtiki ziyaritimizni qobul qilip, qisqiche melumat berdi.

D u q bu yil yawropa döletliridiki türk we musulman teshkilatliri mes'ullirini iptar ziyapitige teklip qilip, ular bilen bolghan hemkarliqni kücheytish meqsitide bir qatar pa'aliyetlerni élip bérishni qarar qilghan. D u q namida 4-ayning 21-küni awstriye paytexti wéna shehiride ötküzülgen iptar pa'aliyitige d u q ning re'isi dolqun eysa ependi bashchiliqidiki d u q rehberliri qatnashqan. Iptarda dolqun eysa ependi söz qilip, Uyghurlarning hazirqi éghir weziyiti dunyadiki her qaysi döletlerning Uyghur mesilisige bolghan pozitsiyesi toghrisida melumat bergendin kéyin islam döletlirini Uyghur mesilisige qarita sükütini buzushqa chaqirghan.

Awstriye paytexti wéna shehiride ötküzülgen iptar pa'aliyitidin körünüsh. 2022-Yili 21-aprél.
Awstriye paytexti wéna shehiride ötküzülgen iptar pa'aliyitidin körünüsh. 2022-Yili 21-aprél.
RFA/Erkin Tarim

Bu, awstriyede dunya Uyghur qurultiyi bilen awstriye Uyghur jem'iyiti bergen tunji qétimliq iptar hésablinidiken. Mezkur iptar pa'aliyiti toghrisida téléfon ziyaritimizni qobul qilghan d u q re'isi dolqun eysa ependi, yawropadiki türk we musulman ammiwi teshkilatlirigha iptar ziyapiti uyushturushtiki meqsiti heqqide toxtilip mundaq dédi: “Bir qanche yildin buyan dunya Uyghur qurultiyining islam dunyasigha qarita pa'aliyetlerni kücheytish xizmet pilani bar. ‛Uyghur irqiy qirghinchiliqi‚gha qarita musulman döletlirining jim turuwélishi, béshini ichige tiqiwélishi, hetta bu mesilide xitayning yénida turushi bizni bi'aram qiliwatqan mesililerdin biri. Shunga biz dunya Uyghur qurultiyi bu heqte pa'aliyetlirimizni kücheytishke tirishiwatimiz. Buni emelge ashurush üchün ramizan éyi yaxshi bir purset. Chünki yawropada nurghun türk ammiwi teshkilatliri bar. Bu teshkilatlarning öz dölitidiki hökümet, siyasiy partiyeler we ammiwi teshkilatlar bilen yéqin alaqiliri bar. Uyghur irqiy qirghinchiliqigha qarita islam döletlirini heriketke ötküzüsh üchün yawropadiki musulman ammiwi teshkilatlar bilen munasiwitimizni kücheytishke tirishiwatimiz. Mesilen gérmaniyede 3 milyondin artuq türk yashaydu. Bashqa yawropa döletliridimu türkler nahayiti köp. Shunga ramizan éyida yawropa döletliride iptar pa'aliyetliri ötküzüwatimiz”.

D u q diniy ishlar komitéti re'isi turghunjan alawuddin ependi 21-aprél küni awstriyede ötküzülgen iptar pa'aliyitide dolqun eysa ependining doklat bérip, ‛Uyghur irqiy qirghinchiliqi‚ toghrisida melumat bergenlikini, buni anglighan yighin ehlining Uyghurlarni qollaydighanliqini ipadileshkenlikini otturigha qoydi.

D u q re'isi dolqun eysaning bildürüshiche gérmaniyening köln shehiri musulman, xristi'an we yehudiy dinidin bolghan ammiwi teshkilatlar eng köp jaylashqan sheher iken. Shunga d u q 15-aprél küni tunji qétimliq iptar pa'aliyitini gérmaniyening köln shehiride ötküzgen. U, köln shehiride ötküzülgen iptar pa'aliyitige oxshimaydighan dinlargha mensup ammiwi teshkilatlarning mes'ullirining ishtirak qilghanliqini, muweppeqiyetlik ötküzülgenlikini tekitlidi.

Igilishimizche yawropadiki türk we islam ammiwi teshkilat mes'ullirigha iptar bérish pa'aliyiti aldimizdiki künlerde myunxén shehiride ötküzülidighan iptar pa'aliyiti bilen yene dawamlishidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet