Долқун әйса: “рим папаси уйғур ирқий қирғинчилиқини тонуши керәк!”

Ихтиярий мухбиримиз әкрәм
2022.09.23
Share on WhatsApp
Share on WhatsApp
Долқун әйса: “рим папаси уйғур ирқий қирғинчилиқини тонуши керәк!”
RFA/Ekrem

Австрийәниң “католик ахбарат агентлиқи” 23-сентәбир күни “дуня уйғурлириниң рәһбири: папа уйғур ирқий қирғинчилиқини тонуши керәк” намлиқ бир мақалә елан қилди. Мақалидә д у қ рәиси долқун әйса әпәндиниң 22-сентәбир австрийә парламентида сөзлигән нутуқида рим папасини уйғур ирқий қирғинчилиқини тонушқа вә уйғурлар үчүн актип аваз чиқиришқа чақирғанлиқи мәркизи тема сүпитидә оттуриға қоюлған иди.

Мақалидә баян қилишичә, “дуня уйғурлириниң рәиси болған долқун әйса әпәнди шәрқий түркистандики ирқий қирғинчилиққа хатимә бериш үчүн, һәрқайси дөләтләрдә һөкүмәтләр вә җәмийәтләр ортақ күч чиқарғандин ташқири, католик дининиң папаси болған франсискусниңму сүкүтлирини бузуп, уйғур ирқий қирғинчилиқини тонуш вә уйғурлар үчүн актип аваз чиқириш лазимлиқини чақириқ қилған.”

Мақалидә рим папаси франсискусниң әмәлийәттә 2020-йилиниң ахири елан қилған “чүш көрүшкә җүрәт қилайли” намлиқ китабида “бичарә уйғурлар” һәққидә тохталғанлиқи, уйғурларниң һалиниң роһинга мусулманлириниң һалиға селиштурулғанлиқи әскәртип өтүлгән. Мақалидә “шинҗаң” аталғусиниң арқисиға “шәрқий түркистан” дегән изаһат қошулған иди.

gulzire-rim-papa.jpg

Бүгүн 23-сентәбир венадин зияритимизни қобул қилған д у қ рәиси долқун әйса әпәндиниң билдүришичә, улар 20-сентәбир җәнвәдики паалийәтлирини ахирлаштуруп, 21-сентәбир австрийә парламентиниң тәклипи билән венаға йетип кәлгән болуп, лагер шаһити сайрагүл савутбайлар билән биргә парламентта җаза лагерлири тоғрисида гуваһлиқ бәргән.

22-Сентәбир күни австрийә парламентида йәнә аммиға очуқ болған уйғурларға мунасивәтлик бир йиғин болуп өткән. Д у қ рәиси долқун әйса мушу йиғинда оттуриға қоюлған диний саһәдикиләрниң суаллириға җаваб бәргәндә, рим папаси франсискусни уйғур ирқий қирғинчилиқини тонуш вә уйғурлар үчүн актип аваз чиқиришқа дәвәт қилған.

23-Сентәбир күни йәнә австрийәниң “ахбарат” намлиқ күндилик гезити “хитайниң қайта тәрбийәләш лагерлириниң арқиға немә йошурунған?” намлиқ мақалә елан қилип, хитай һакимийити “қайта тәрбийәләш оргини” дәп атаватқан бу җаза лагерлириниң арқа пәрдисидә ирқий қирғинчилиқниң йүз бериватқанлиқини баян қилип өткән.

Мақалидә аптор алди билән уйғурлар тоғрисида мәлумат берип мундақ дәйду: “‛шинҗаң‚ дегән бу исим хитайниң ғәрбий-шималидики байлиқи мол болған бир өлкиниң хитайчә атилишидур. Униң мәниси ‛йеңи чигра‚ дегәнлик болиду, бирақ бу йәрдики мусулман хәлқләр үчүн у йәнила шәрқий түркистандур. Пүтүн дунядики уйғурларниң вә башқа қошна мусулман хәлқләрниң 90 пирсәнти мушу тупрақта яшайду.”

Мәзкур мақалә лагер шаһити сайрагүл савутбайниң баянлири билән толған болуп, бүгүн җәнвәдин зияритимизни қобул қилған сайрагүл алди билән 21-сентәбирдики гуваһлиқ бериш йиғини тоғрисида тохтилип өтти. У йәнә 22-сентәбир парламентта өткүзүлгән чоң йиғинда б д т кишилик һоқуқ кеңишигә йеңидин алий комиссар болуп тәйинләнгән австрийәлик волкер түркни уйғур ирқий қирғинчилиқиға қарши актип һәрикәткә өтүшкә чақирған. Сайрагүл савутбай венада турған бу бирқанчә күндә, ахбарат саһәсиниң зиярәтлириниму қобул қилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.