Мюнхендики америка баш консули д у қ рәиси долқун әйса билән очуқ тор сөһбити өткүзди

Ихтиярий мухбиримиз әкрәм
2020-10-26
Елхәт
Пикир
Share
Принт
Мюнхендики америка баш консули меған грегонис ханим билән д у қ рәиси долқун әйса очуқ тор сөһбити өткүзүватқан көрүнүш. 2020-Йили 26-өктәбир.
Мюнхендики америка баш консули меған грегонис ханим билән д у қ рәиси долқун әйса очуқ тор сөһбити өткүзүватқан көрүнүш. 2020-Йили 26-өктәбир.
RFA/Ekrem

Баш консул меган грегонс билән д у қ рәиси долқун әйса әпәндиниң сөһбәт темиси кәң саһәләргә четилди.

22-Өктәбир күни американиң мюнхендики консулханиси шәрқий түркистанниң ай-юлтузлуқ көк байқириниң көләңгиси астида «1 милйон уйғур лагерда» дегән символлуқ бәлгә билән иҗтимаий таратқуларда учур тарқатти. Мәзкур учурда баш консул меган грегонс билән д у қ рәиси долқун әйса әпәндиниң 26-өктәбир күни уйғурлар вәзийити тоғрисида очуқ тор сөһбити елип баридиғанлиқини елан қилған иди. Бу тор сөһбити бүгүн чүштин кейин саәт 15:30 да башланди.

Бүгүнки бу тор сөһбитидә баш консул мәган грегонс ханимниң долқун әйсадин сориған тунҗи соали «сиз алди билән д у қ вә униң хизмәтлири тоғрисида чүшәнчә бәрсиңиз, сиз қачандин буян бу тәшкилатта хизмәт қиливатисиз вә униңға рәһбәрлик қилип кәлдиңиз?» дегәндин ибарәт болди.

Долқун әйса әпәнди бу һәқтә тохталғанда д у қ ниң 2004-йили қурулғанлиқини вә қурулғандин буян муһаҗирәттики уйғурларниң вәкил характерлик алий оргини сүпитидә дуня миқясида уйғурлар мәсилисини тонутуш билән шуғуллинип кәлгәнликини, 2017-йили өзиниң рәис болуп сайланғандин буян елип барған паалийәтлирини қисқичә изаһлап өтти.

Сөһбәттә йәнә «шинҗаңниң һазирқи вәзийити қандақ? сиз өзиңизниң қисқичә кәчмишлири тоғрисида мәлумат берәләмсиз һәмдә уйғур кишилик һоқуқ көрүши мусаписидә қолға кәлтүргән нәтиҗиләр тоғрисида тохтилип өтәмсиз? биз игилигән мәлуматларға қариғанда, хитай хәлқ җумһурийити хитайға қарита пикир баян қилғанларниң аилә-тавабиатлириға ниспбәтән бесим қилидикән. Бундақ иш сиз яки аилиңиздикиләргә қарита йүз берип бақтиму? силәрниң йеқинқи йиллардин буян елип бериватқан паалийәтлириңларда муәййән бир өзгиришләр, илгириләшләр болдиму? сиз хитай һөкүмитиниң тохтимай қарилашлири вә әйибләшлиригә қандақ тақабил туруп кәлдиңиз? хәлқара җәмийәт бу зулумларға хатимә бериши үчүн қандақ қилиши лазимлиқини тәшәббус қилисиз?. . .» Дегәндәк соаллар соралди.

Д у қ рәиси долқун әйса әпәнди соалларға уйғур дияриниң нөвәттики реал вәзийитини, өзиниң, аилисиниң әмәлий кәчмишлирини чиқиш қилип туруп әтраплиқ җавабларни бәрди. Җаза лагерлирида йүз бериватқан паҗиәләр, уйғур нарисидәлириниң бешиға келиватқан күлпәтләр, мәҗбурий туғут чәкләш, мәҗбурий әмгәк вә нәсил қурутуш характерлик зулумлар, мәдәнийәт қирғинчилиқи, хитайлаштуруш ассимилятсийә қатарлиқлар униң җавабиниң асасий мәзмунини тәшкил қилди.

Д у қ ниң муавин рәиси пәрһат муһәммиди әпәнди америка консулиниң д у қ рәиси билән өткүзгән бу очуқ тор сөһбитигә қарита пикир баян қилғанда, «бу паалийәт американиң уйғур миллий һәрикитини қоллашиниң бундин кейин йәниму күчийидиғанлиқидин дерәк бериду,» деди. Д у қ ниң рәис вәкили, «шәрқий түркистан өлималар бирлики» ниң муавин рәиси турғунҗан алавудун әпәнди бу һәқтә тохталғанда, америка консулханисиниң д у қ билән иш бирлики һәм очуқ сөһбәт елип беришиниң д у қ ниң хәлқарадики орнини техиму йүксәлдүридиғанлиқини илгири сүрди.

Мюнхендики америка консулханисиниң д у қ билән бирлишип уюштурған бу паалийити «уйғур һәптилики паалийити» дәп аталған болуп, баш консул меган грегонс ханим йәнә 28-өктәбир күни д у қ ниң явропаға мәсул вәкили әсқәрҗан билән, 30-өктәбир күни д у қ ниң программа йетәкчиси зумрәтай әркин билән очуқ тор сөһбити елип баридикән.

Пикирләр (0)
Share
Толуқ бәт