Dörbiljindiki bir tutqunningmu yer asti lagérda yétip közi körmes bolup qalghanliqi ashkarilandi

Maralbéshida qurban nur isimlik bir tutqunning közi körmes halette lagérdin qoyup bérilgenliki heqqidiki xewirimiz élan qilin'ghandin kéyin muhajirettiki anglighuchilirimizdin biri radiyomizgha uchur yollap, dörbiljin nahiyesidiki oqutquchi yalqun tursunningmu dörbiljindiki türgün lagéridin közi körmes bolup qoyup bérilgenlikini inkas qildi. Éniqlashlirimiz dawamida, yalqun tursunning közi saqaymay turup, ötken ayda qaytidin tutup kétilgenliki delillendi.

 Bixeterlikini nezerde tutup özini ashkarilashni xalimighan, melum bir dölette turuwatqan anglighuchilirimizdin birining ashkarilishiche, dörbiljin nahiyesidiki ottura mektep oqutquchisi yalqun tursun ötken yilning béshida tutqun qilin'ghan we lagérda bir yilche yatqandin kéyin, közi körmes bolup qélip qoyup bérilgen. Biz yalqun tursun heqqidiki bu uchurning toghra-xataliqini aydinglashturush üchün, awwal dörbiljin nahiyelik saqchi qomandanliq merkizige téléfon qilduq. Nöwetchi xadim yalqun tursun heqqide melumat bérishni ret qildi. U izchil soralghan so'allirimizdin kéyin, yalqun tursunning délosining dölet mexpiyetlikige yatidighanliqini ashkarilash bilen birlikte délogha mes'ul bolghan alaqidar xadimning téléfonini teminlidi.

 Anglighuchimizning inkasida, yalqun tursunning dörbiljinning türgün yézisidiki lagérda yatqanliqi eskertilgen. Dörbiljin nahiyelik edliye idarisining xadimimu deslepte türgündiki lagér we tutqun yalqun tursun heqqidiki so'allirimizgha jawab bermidi. Arqidin, bu xadimmu yalqun tursunning ehwalini ashkarilashqa bolmaydighanliqini tekitlesh arqiliq inkastiki uchurlarning toghriliqidin bésharet berdi.

 Qolimizdiki inkasta, yalqun tursunning esli yurti qaramay ikenliki, eslide dörbiljindiki bir ottura mektepte oqutquchiliq qilidighanliqi qeyt qilin'ghan. Dörbiljindiki alaqidar saqchi xadimliridin biri yalqun tursun közi körmes bolup qoyup bérilip 3 aydin kéyin, yeni buningdin bir ay awwal qaytidin tutup kétilgenlikini delillidi. Bu xadimning bayanliridin melum bolushiche, yalqun tursun qoyup bérilgendin kéyin, uning arxipidin yene yéngi gumanliq mesililer bayqalghan. Déyilishiche, yalqun tursun bir yilche yatqan türgün lagéri, yer astigha sélin'ghan bolup, uninggha qilmishi nisbeten éghir dep qaralghan yash we yashraq tutqunlar qamalghan. Mezkur saqchi xadim yalqun tursunning 45 yash chamisida ikenliki we u yatqan yer asti lagérida peqetla bir tünglük barliqi we dérize yoqluqini tilgha aldi.

Aldinqi künidiki éniqlashlirimizdimu, maralbéshidiki lagérdin qoyup bérilgen tutqun qurban nurning közi körmes halette qoyup bérilgenliki we a'ilisining béqishigha tapshurulghanliqi ashkarilan'ghanidi.