Dunya parlamént ezalirining tibet yighini uchrishishida Uyghur pa'aliyetchiliri xitaygha qarshi birliksep hasil qilish iradisini körsetken

Dunya parlamént ezalirining 8-qétimliq tibet yighini 22-iyun küni washin'gtonda ötküzülgen bolup, bu yighin'gha amérika awam palatasining re'isi nensi pélosi, awam palata ezasi jim mekgowrin, shundaqla 20 nechche dölettin kelgen parlamént ezaliri qatnashqan.

Dunya Uyghur qurultiyining re'isi dolqun eysa, Uyghur herikiti teshkilatining bashliqi roshen abbas xanim, Uyghur kishilik hoquq qurulushining diréktori ömer qanat bu yighin'gha teklip bilen qatnashqan hemde nensi pélosi xanim we holliwodning kino cholpini richard gérRichard Gere)) qatarliq dangliq shexsler bilen körüshüp, Uyghurlar mesilisini tibet mesilisige oxshashla küntertipte tutushqa tirishqan؛ shundaqla bu pa'aliyetke qatnishish arqiliq xitayning mustemlike jinayetlirige qarshi tibet pa'aliyetchiliri bilen birliksep hasil qilish iradisini körsetken.

Nensi pélosi xanim bu yighinda sözligen échilish nutuqida xitayning diniy basturush, teqip-nazaret, sayahet cheklimisi qatarliq kishilik hoquq jinayetlirini eybligendin kéyin, “Eger biz soda-menpe'etni dep, xitayning kishilik hoquq jinayetlirige qarshi chiqmisaq, dunyaning bashqa jayliridiki kishilik hoquq jinayetlirige qarshi turidighan exlaq nopuzimizni yoqitip qoyimiz,” dégen.

Dunya Uyghur qurultiyining re'isi dolqun eysa ependi bu qétimliq yighin arqiliq tibet pa'aliyetchiliri bilen téximu yaxshi hemkarliq hasil qilghanliqini bildürdi.

Uyghur herikiti teshkilatining bashliqi roshen abbas xanim bu yighinda Uyghur mesilisige yéqindin köngül bölgen amérika siyasetchiliri bilen körüshüsh pursiti bolghanliqini bayan qildi. Uning bildürüshiche, holliwodning kino cholpini richard gér roshen abbas xanim bilen körüshkende, uninggha “Hedemni izdesh” namliq höjjetlik filimni körüp nahayiti tesirlen'genlikini we xitayning zulumigha qarshi Uyghurlar bilen bir septe turidighanliqini bildürgen.

Igilishimizche, dolqun eysa ependi bu pa'aliyette 20 nechche dölettin kelgen parlamént ezalirigha Uyghurlar mesilisini anglatqan. Bu yighinda uninggha tesir qilghan nuqtilarning biri, kélimat özgirishi mesilisi bolup, xitayning Uyghur rayonidiki muhit buzghunchiliqinimu xelq'araning diqqitige sunush kéreklikini hés qilghan.

Dolqun eysa ependi yene kelgüside Uyghurlar mesilsi toghruluq “Dunya parlamént ezaliri tibet yighini” gha oxshash yighinlarni ötküzüshke teyyarliq qiliwatqanliqini bildürdi.

Tepsiliy mezmunlarni programmining awazliq ulinishidin anglighaysiler.