D u q rehberliri amérikaning myunxéndiki konsuligha Uyghurlarning teshekkürlirini izhar qildi

Ixtiyariy muxbirimiz ekrem
2020-07-14
Élxet
Pikir
Share
Print
Dunya Uyghur qurultiyining re'isi dolqun eysa qatarliq hey'et amérikaning myunxéndiki konsulxanisida ziyarette. 2020-Yili 11-iyul, gérmaniye.
Dunya Uyghur qurultiyining re'isi dolqun eysa qatarliq hey'et amérikaning myunxéndiki konsulxanisida ziyarette. 2020-Yili 11-iyul, gérmaniye.
RFA/Ekrem

Myunxéndiki amérika konsulxanisining korona wirusi tarqalghandin buyanqi tunji méhmini dunya Uyghur qurultiyining ziyaretchiler ömiki bolghan.

11-Iyul küni amérikaning myunxéndiki konsulxanisi özining twittér hésabida d u q re'isi dolqun eysa bashliq bir guruppa wekiller bilen bash konsul mégan xanimning birge chüshken süritini élan qilghan. Süretke kirish söz ornida "'2020-yilliq Uyghur kishilik hoquq siyasiti qanuni' Uyghurlar jem'iyiti üchün muhim bir abide boldi. D u q re'isi dolqun eysaning ziyaritige we uning bizni kishilik hoquqni depsende qilghuchilarning mes'uliyitini sürüshtürüshni muzakire qilish pursiti bilen teminligenliki üchün rehmet éytimiz," dégen ibariler kirgüzülgen. Yazmida "Xitaydiki jaza lagéliri taqalsun" dégen jümle alahide eskertilgen.

Bu uchurgha bina'en biz amérika konsulxanisida söhbette bolghan d u q rehberlirini ziyaret qilip, bu qétimqi söhbetning meqsiti we jeryani toghrisida melumat soriduq. D u q re'isi dolqun eysa ependi bu heqte toxtalghanda xitaydin tarqalghan korona wirusi dunyagha apet élip kélishke bashlighan 3-aydin buyan héchqandaq ziyaretchi qobul qilmighan amérika konsulxanisining özlirini tunji méhman süpitide qobul qilghanliqini eskertti. U sözide amérikaning myunxéndiki bash konsuli mégan xanim bilen sherqiy türkistanning nöwettiki weziyiti üstide etrapliq muzakirilerde bolghanliqini tilgha aldi. Söhbet jeryanida u "2020-Yilliq Uyghur kishilik hoquq siyasiti qanuni" ning testiqtin ötkenlikidin Uyghurlarning köp xursen bolghanliqini, Uyghur xelqi namidin amérika hökümitige rehmetlirini bildüridighanliqini ipade qilghanliqini bayan qilip ötti.

Amérika konsulxanisida élip bérilghan bu ziyaretke d u q ning programma yitekchisi éwa xanimmu qatnashqan bolup, u bu heqte toxtalghanda, bu qétimqi söhbetning asasiy mezmunining Uyghurlar duch kéliwatqan éghir weziyetke merkezleshkenlikini tilgha aldi. U mundaq dédi: "Uyghurlarning échinarliq weziyiti dunyada yéterlik derijide diqqet qozghiyalmaywatqan bu künlerde, Uyghurlar mesilisini dölet xizmetlirining aldinqi küntertipide tutup kéliwatqan birdin-bir dölet amérika bolmaqta. Amérika'ing muhim dölet erbabliri Uyghurlar mesilisini her yerde tilgha élip kelmekte. '2020-yilliq Uyghur kishilik hoquq siyasiti qanuni' ning testiqtin ötüshi Uyghurlar üchün zor tarixiy bir hadise boldi. Bizning amérikaning myunxéndiki konsulxanisini ziyaret qilishimizdiki meqset yalghuz amérikagha Uyghur xelqining minnetdarliqini bildürüsh üchünla emes, belki bundin kéyin öz'ara hemkarlishish arqiliq Uyghurlarni bu zulumlardin qutuldurush üchün yene qandaq ishlarni qilalaydighanliqimiz toghrisida muzakirilishishtin ibaret boldi."

Bu qétimqi ziyaretke daxil bolghan d u q ning xizmetchi xadimi zumret Uyghur xanim bu xususta toxtalghanda, xitayning chékidin ashqan zulumliri seweblik éghir derijide ümidsizlikke giriptar bolghan Uyghurlargha amérika hökümiti testiqlighan "2020-Yilliq Uyghur kishilik hoquq siyasiti qanuni" ning zor teselli bolghanliqini, Uyghur xelqining buninggha bolghan minnetdarliqini d u q namidin amérika hökümitige yetküzüsh we Uyghurlar mesilisige yéqindin köngül bölüp kelgen amérikaning myunxéndiki konsulxanisi bilen bundin kéyin qaysi sahelerde qandaq hemkarlishish toghrisida öz'ara muzakire élip bérish üchün bu qétimqi ziyaretni uyushturghanliqini tekitlidi.

D u q xadimlirining bildürüshiche, xitayning jaza lagérlirini tesis qilip milyonlighan Uyghurlarni qamighanliqi we éghir derijide azablawatqanliqi ashkarilinishqa bashlighan 2018-yilidin buyan amérikaning myunxéndiki konsulliri d u q rehberliri bilen türlük shekillerde pat-pat uchrishishlar élip bérip, xitay hakimiyitining insaniyetke qarshi bu zorawanliqigha xatime bérishning yolliri üstide ortaq izdinip kelmekte iken. Amérikaning gérmaniye paytexti bérlindiki bash elchisimu aldinqi yilliri d u q rehberliri bilen mexsus uchrishishlar élip barghan.

Toluq bet