Dolqun eysa ependi d u q ning 20 yilliqi munasiwiti bilen chaqiriq élan qildi

Enqeredin ixtiyariy muxbirimiz erkin tarim teyyarlidi
2024.04.16
duq-chaqiriq-dolqun-eysa.jpg D u q gérmaniyening myunxén shehiridiki merkez ishxanisida ötküzülgen d u q qurulghanliqining 20 yilliqini xatirilesh pa'aliyiti heqqide chaqiriq élan qilish yighinida d u q ning re'isi dolqun eysa ependi sözlimekte. 2024-Yili 14-aprél, myunxén.
RFA/Erkin Tarim

Dunya Uyghur qurultiyi 14-aprél küni gérmaniyening myunxén shehiridiki merkez ishxanisida yighin chaqirip, 5-ayning 3-künidin 6-künigiche myunxénda ötküzülidighan d u q qurulghanliqining 20 yilliqini xatirilesh pa'aliyiti heqqide chaqiriq élan qildi. Chaqiriqta barliq Uyghurlarni bu pa'aliyetke teklip qildi.

14-Aprél künidiki dunya Uyghur qurultiyi re'isi dolqun eysa ependining riyasetchilikide ötküzülgen qurultay qurulghanliqining 20 yilliqi toyigha teyyarliq xizmet yighinigha gérmaniyediki jümlidin myunxéndiki serxillar, dunya Uyghur qurultiyi rehberliri, gérmaniye Uyghur medeniyet-ma'arip birlikining mes'ulliri 3 meshrepning yigit bashliri we xanim-qizlar qatnashqan. Mezkur yighinda 5-ayning 3-künidin 6-künigiche myunxénda ötküzülidighan d u q ning 20 yilliqini xatirilesh toyigha hazirliq xizmetliri muzakire qilinip, xizmet teqsimati qilin'ghan. Yighin axirida dolqun eysa ependi bu heqte mexsus chaqiriq élan qildi.

U, sözini mundaq bashlidi: “Del buningdin 20 yil ilgiri2004-yili 4-ayning 16-küni, yeni 20 yil ilgiri mushu sheherde, shu waqitta dunyaning her qaysi jaylirida pa'aliyet élip bériwatqan Uyghur teshkilatlirining mes'ulliri we wekilliri jem bolup sherqiy türkistan dewasining xelq'aradiki eng yüksek hoquqluq bir merkiziy orgini bolghan dunya Uyghur qurultiyini qurup chiqqan iduq. Mana emdi teshkilatimizning qurulghanliqining 20 yilliqini xatirilesh aldida turuwatimiz. Bu 20 yil jeryanida dunyaning her qaysi jayliridiki wetenperwerlirimizning her türlük maddiy we meniwi yardimi bilen bügünki künde dunya Uyghur qurultiyi xelq'arada Uyghur dewasigha wekillik qilidighan, Uyghur xelqining heq we hoquqini qoghdaydighan bir sewiyege kélip, xelqimiz üchün xizmet qilish pursitige ige bolaliduq. Mushu ötken 20 yilliq xizmetlirimizning xulasisi sheklide 5-ayning 3-künidin 6-künigiche bolghan 3 kün jeryanida myunxéndiki barliq Uyghurlarning sahibxaniliq qilishi bilen dunyaning her qaysi jayliridin kelgen méhmanlirimizni kütüwélishqa teyyarliq qiliwatimiz.”

Dolqun eysa ependi chaqiriqida üch künlük pa'aliyetlerning mezmuni toghrisida toxtaldi. U, mundaq dédi: “Bu üch kün jeryanida her xil pa'aliyetlirimiz bolidu. Méhmanlarni silerning maddiy yardiminglar bilen sétiwalghan mushu merkizimizde kütüwalimiz. Dunya Uyghur qurultiyigha köngül bölüwatqan karxanichilirimizning, tijaretchilirimizning, wetendashlirimizning we xanim-qizlirimizning yardem qilishi bilen Uyghur medeniyet merkizimizni, ishxanimizni sétiwélip resmiy xizmetke achtuq. 20 Yilliq toyimizda bu yérimizni silerge tonushturimiz. Biz teyyarliq xizmetlirimizni bu merkezde élip bériwatimiz. Bu üch künlük pa'aliyetke diniy ölimalirimiz, ziyaliylirimiz, jama'et erbablirimiz kélidu. Köp sanda chet ellik mutexessislermu kélidu. Bular bilen söhbet yighinlirini ötküzimiz. Dunyaning her qaysi jayliridin Uyghur sen'etchilirimiz kélidu. Bu sen'etchilimiz bizning milliy medeniyetlirimizni namayende qilidu. Démek biz mol mezmunluq we köp xilliqqa ige pa'aliyetler bilen dunya Uyghur qurultiyining 20 yilliq toyini ötküzimiz.”

Dunya Uyghur qurultiyi mes'ullirining éytishiche, xatirilesh pa'aliyitige 20 etrapida dölettin 300 etrapida wekil we méhman ishtirak qilidiken. Bu dunya Uyghur qurultiyining 20 yilliq tarixida ötküzülgen tunji qétimliq keng-kölemlik pa'aliyet iken. Dolqun eysa ependi dunya Uyghur qurultiyining bu shanliq toyigha dunyaning her qaysi jaylirida yüriki weten we millet üchün séliwatqan teklipname tapshurup alghan yaki almighan barliq Uyghurlarning qatnishishini qarshi alidighanliqini éytti.

D u q ning mu'awin re'isi perhat muhemmedi ependi, bügün xelq'araliq bir teshkilatqa aylan'ghan d u q ning intayin murekkep bir xelq'araliq weziyette dunyagha kelgenlikini, ötken 20 yilliq musape jeryanida zor utuqlarni qolgha keltürgenlikini ipade qildi. U, sözide, d u q hazirghiche qolgha keltürgen utuqlarni téximu köp Uyghurlar bilen ortaqlishish üchün 20 yilliq toyigha köp sanda méhman teklip qilghanliqini, shunga arqa sep xizmetliride bezi qiyinchiliqlargha duch kélidighanliqini, Uyghurlarning buni toghra chüshinip hemkarlishishini iltimas qilidighanliqini tekitlidi.

D u q ning diniy xizmetlirige mes'ul ijra'iye hey'iti mu'awin re'isi, yighinning teyyarliq komitéti mes'uli turghunjan alawuddin ependi teyyarliq xizmitining yaxshi kétiwatqanliqini, eger qatnishishni xalaydighan Uyghurlar bolsa özi bilen alaqe ornatsa bolidighanliqini tekitlidi. U, bu qétimqi yighinda sherqiy türkistanning bésiwélin'ghan zémin ikenliki toghrisida teyyarlan'ghan doklatni yighin ehlilirige teqdim qilinidighanliqini bildürdi.

Igilishimizche, dunya Uyghur qurultiyi zamanida muhajirettiki Uyghur milliy herikitining yétekchi organliri hésablan'ghan sherqiy türkistan (Uyghuristan) milliy qurultiyi bilen dunya Uyghur yashliri qurultiyining birlishishi netijiside 2004-yili 16-aprél gérmaniyening myunxén shehiride qurulghan. 20 Yilliq bir tarixiy musapini bashtin köchürgen d u q ning bügünki künde sherqiy türkistan milliy mujadilisining wekillik orgini süpitide öz xelqining ishenchige hemde b d t, yawropa ittipaqi we amérika bashliq nurghun döletlerning étirap qilishigha érishishi, elwette bihésab bedellerning mehsuli iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.