Д у қ рәиси чехийә пайтәхти прага шәһридә паалийәт елип бармақта

Ихтиярий мухбиримиз әкрәм
2021-10-12
Share
Д у қ рәиси чехийә пайтәхти прага шәһридә паалийәт елип бармақта Д у қ рәиси чехийә пайтәхти прага шәһиридә паалийәт елип бармақта. 2021-Йили 12-өктәбир.
RFA/Ekrem

"уйғур ирқий қирғинчилиқи" ни етирап қилған чехийә һөкүмити д у қ хадимлирини "мунбәр 2000" йиғиниға тәклип қилған.

12-Өктәбир күни чехийә пайтәхти прага шәһридин игилигән мәлуматлиримизға қариғанда, "уйғур ирқий қирғинчилиқи" ни етирап қилған чехийә парламенти 11-өктәбир пайтәхт прага шәһридә башланған "мунбәр 2000" йиғиниға долқун әйса башлиқ д у қ хадимлириниму тәклип қилған.

Д у қ рәиси долқун әйса әпәндиниң билдүришичә, "мунбәр 2000" ни чехийә җумһурийитиниң тунҗи рәиси, мәшһур кишилик һоқуқ рәһбири васлав хавел қурған болуп, дуня миқясида кишилик һоқуқни илгири сүрүш мәқситидә һәр йили өткүзүлүп келиватқан бу йиғин 25 йилдин буян давам қилип кәлмәктә икән.

Долқун әйса әпәндиниң әскәртишичә, бу қетимқи йиғинда көплигән дөләт әрбаблири сөз қилған. Йиғин җәрянида мәхсус хитай зулумиға дучар болуватқан уйғур, тибәт қатарлиқ милләтләрниң нөвәттики паҗиәлик вәзийитини аңлитидиған муһакимә мунбири тәсис қилинған. Д у қ рәиси долқун әйса уйғурларға вакалитән, тибәт сүргүндики һөкүмитиниң сабиқ баш министери лобсаң саңгай тибәтләргә вакалитән сөз қилип, хитайниң "инсанийәткә қарши җинайәт" лири вә "ирқий қирғинчилиқи" ни паш қилған.

Бу қетимқи йиғин д у қ рәһбәрлирини чехийә вә силовакийәниң көплигән сиясий әрбаблири билән учришип, уйғурлар мәсилисини аңлитиш пурсити билән тәминлигән. Д у қ рәиси долқун әйса әпәнди йиғин җәрянида "уйғур ирқий қирғинчилиқи" ни парламентта етирап қилдурушқа зор һәссә қошқан чехийә кеңәш палатасиниң рәиси билән көрүшүп, униңға уйғурларниң минәтдарлиқини билдүргән. Д у қ ниң программа йетәкчиси зумрәтай уйғурму бу паалийәтләргә иштирак қилған болуп, у бу қетимқи йиғинниң наһайити әһмийәтлик өткәнликини тилға алди.

Мәлум болғинидәк, д у қ 7-нөвәтлик омумий вәкилләр қурултийини чехийә пайтәхти прага шәһридә өткүзүшни пиланлимақта. Бу қурултайға 300 гә йеқин уйғур вәкилләр қатнашқандин сирт, йәнә чехийә вә силовакийә парламентиниң әзалири, явропа парламентиниң әзалири һәм мәшһур сиясий әрбаблар, кишилик һоқуқ актиплири болуп уйғурлар мәсилисигә көңүл бөлүдиған көп сандики ғәрбликләрму қатнишидикән. Хитайниң һәр түрлүк тосқунлуқлириға қаримай, прагада қурулған мәзкур йиғинниң тәйярлиқ комитети йиғин һазирлиқлирини җиддий елип бармақта икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт