D u q ijra'iye komitéti yighinida “Dunya Uyghur qurultiyining 6 ayliq xizmet pilani” qobul qilindi

15-Iyul chaqirilghan d u q ijra'iye komitétining tor yighinida “Dunya Uyghur qurultiyining aldimizdiki 6 ayliq xizmet pilani” qobul qilindi.

Mezkur tor yighinida, aldi bilen dunya Uyghur qurultiyining re'isi dolqun eysa ependi échilish nutqi sözligendin kéyin, ijra'iye re'isi ömer qanat ependi we her qaysi komitétlarning mudirliri ötken 6 ayda qilghan xizmetliri toghrisida doklat bergendin kéyin, aldimizdiki 6 ay ichide élip bérilidighan xizmetler toghrisida muzakire élip bérildi. Uzun muzakire netijiside “Dunya Uyghur qurultiyining aldimizdiki 6 ayliq xizmet pilani” yighin'gha qatnashqan ijra'iye komitéti ezalirining birdek awazi bilen maqulluqtin ötti we qurultay re'isi dolqun eysa ependining riyasetchilikide shu kündin bashlap resmiy ijra qilinishqa bashlidi.

Dunya Uyghur qurultiyi ijra'iye komitétining re'isi ömer qanat ependining riyasetchilikide ötküzülgen yighin'gha dunya Uyghur qurultiyi rehberliri we her qaysi komitétlarning mudirliridin bolup 35 kishi ishtirak qildi. Mezkur yighin 8 sa'ettin artuq élip bérildi. Yighinda d u q ta saqliniwatqan mesililermu otturigha qoyuldi.

Yighin axirlashqandin kéyin bu heqte téléfon ziyaritimizni qobul qilghan d u q re'isi dolqun eysa ependi, buning dunya Uyghur qurultiyining 7-nöwetlik wekiller yighinidin kéyin chaqirilghan 3-nöwetlik ijra'iye komitéti yighini ikenlikini, yighinda muhim mesililerning muzakire qilinip, xizmet pilani tüzüp chiqilghanliqini bayan qilip mundaq dédi: “Dunya Uyghur qurultiyi özining nizamnamiside belgilen'gen belgilime we uzun yillardin buyan dawamlashturup kéliwatqan xizmet pirinsipi boyiche dunya Uyghur qurultiyi ijra'iye komitéti ezaliri her 6 ayda bir qétim bir yerge jem bolidu. Bu yighinda ötken 6 ayliq xizmetni xulasiligendin kéyin, kéyinki 6 ayliq xizmet pilani tüzüp chiqilidu. Biz bu qétimqi dunya Uyghur qurultiyining 7-nöwetlik qurultiyining 3-nöwetlik ijra'iye yighinini tor bilen échishqa mejbur bolduq. Buning sewebi iqtisadiy jehettin we waqit jehettin téjesh. D u q ijra'iye komitétining ezalirining köpi xalisane xizmet qiliwatidu. Xizmet orunliridin ruxset élishlirimu qéyin bolghachqa tor arqiliq achtuq.”

2023-Yili 7-ayning17-künidin tartip resmiy ijra qilinishqa bashlan'ghan mezkur xizmet pilani qaysi mezmunlarni öz ichige alghan? bu so'alimizgha dunya Uyghur qurultiyi ijra'iye komitétining re'isi ömer qanat ependi jawab berdi. U, mezkur yighinda xitayning hazir xelq'arada künsayin küchiyiwatqan yalghan teshwiqatigha qandaq taqabil turush toghrisida nuqtiliq muzakire élip bérip, xizmet pilani tüzülgenlikini tekitlidi.

Amérika bashchiliqidiki bir qisim gherb döletliri2022-yili 10-ayning 1-küni b d t kishilik hoquq kéngishining Uyghurlar heqqidiki doklatida bayan qilin'ghan wehshiyliklerge qarita musteqil tekshürüsh élip bérish-barmasliq we Uyghurlar mesilisini mexsus muzakire qilish toghrisida b d t gha bir teklip layihesi sun'ghanidi. Mezkur layihening netijisi10-ayning 6-küni b d t da bélet tashlash arqiliq belgilen'genidi. B d t kishilik hoquq kéngishige eza 47 dölet ichidin amérika bashliq gherb démokratik döletliri 17 awazgha, xitay we uning terepdarliri 19 awazgha érishken. 11 Dölet awaz bérishtin waz kechkenidi.

15-Iyul küni chaqirilghan 3-nöwetlik ijra'iye komitéti yighinida aldimizdiki 6 ay ichide, d u q ning b d t diki pa'aliyetlirini kücheytip, mezkur qarar layihesini qayta kün tertipke élip kélish üchün tirishchanliq körsitish, Uyghur mesilisini dunyaning küntertipide qayta küchlendürüsh üchün pa'aliyet élip bérish qarar qilin'ghan. Ijra'iye komitéti re'isi ömer qanat ependi bu heqte melumat berdi.

Dünya Uyghur qurultiyining teshkiliy ishlargha mes'ul mu'awin re'isi perhat muhemmidi ependi 3-nöwetlik ijra'iye komitéti yighinida dunya Uyghur qurultiyining teshkiliy mesililiri we bashqa teshkilatlar bilen bolghan munasiwiti toghrisidimu muzakire élip bérip, bu heqtimu qarar qobul qilghanliqini ilgiri sürdi.

Dunya Uyghur qurultiyi 2004-yili 4-ayning 16-künidin 19-künigiche gérmaniyening myunxén shehiride chaqirilghan 1-nöwetlik wekiller qurultiyida sherqiy türkistan (Uyghuristan) milliy qurultiyi bilen dunya Uyghur yashliri qurultiyining birlishishi bilen qurulghan bolup, mezkur qurultay 19 yildin buyan öz pa'aliyetlirini aktip élip barmaqta.