Д у қ рәһбәрлири финландийә һөкүмити вә парламентидин “уйғур ирқий қирғинчилиқи” ни етирап қилишни тәләп қилған

Ихтиярий мухбиримиз әкрәм
2022-04-29
Share
Д у қ рәһбәрлири финландийә һөкүмити вә парламентидин “уйғур ирқий қирғинчилиқи” ни етирап қилишни тәләп қилған Финландийә парламенти вә һөкүмитидин “уйғур ирқий қирғинчилиқи” ни етирап қилиш вә бу һәқтә қарар мақуллашни тәләп қилип финландийәгә барған д у қ рәһбәрлири. 2022-Йили 28-апрел.
RFA/Ekrem

Д у қ рәһбәрлири финландийә парламенти вә һөкүмитидин “уйғур ирқий қирғинчилиқи” ни етирап қилиш вә бу һәқтә қарар мақуллашни тәләп қилған.

28-Априлдин етибарән финландийә зияритини башлиған д у қ рәһбәрлири пайтәхт хелсинкида финландийә парламенти вә һөкүмитигә “уйғур ирқий қирғинчилиқи” ни етирап қилдуруш үчүн бирйүрүш паалийәтләрни елип барған. Бу зиярәткә д у қ рәһбәрлиридин долқун әйса, турғунҗан алавудун вә зумрәтайлар қатнашқан.

Д у қ рәиси долқун әйса әпәнди бүгүн бу һәқтә зияритимизни қобул қилғанда, “уйғур ирқий қирғинчилиқи” ни финландийә дөләт әрбаблириға аңлитиш вә “уйғур сот коллегийәси” ниң өткән йили бу хусуста чиқарған “ирқий қирғинчилиқ” қарарини тонуштуруп, бир қисим демократик ғәрб дөләтлиригә охшаш финландийәниңму бу һәқтә қарар қобул қилишини қолға кәлтүрүшниң бу қетимқи зиярәтниң асаслиқ мәқсийи болғанлиқини тилға алди һәмдә бу зиярәтниң әһмийити тоғрисида тохтилип өтти.

Д у қ рәһбәрлири финландийә парламенти вә һөкүмитидин “уйғур ирқий қирғинчилиқи” ни етирап қилиш вә бу һәқтә қарар мақуллашни тәләп қилиш паалийитини башливәтти. 2022-Йили 28-апрел.
Д у қ рәһбәрлири финландийә парламенти вә һөкүмитидин “уйғур ирқий қирғинчилиқи” ни етирап қилиш вә бу һәқтә қарар мақуллашни тәләп қилиш паалийитини башливәтти. 2022-Йили 28-апрел.
RFA/Ekrem

Д у қ иҗраийә комитетиниң муавин рәиси турғунҗан алавудун әпәндиниң билдүрүшичә, д у қ вәкиллири бу икки күндин буян финландийә ташқий ишлар министерлики вә финландийә парламентиниң хадимлири билән көрүшүп, муһим сөһбәтләрни елип барған. Шуниң билән биргә, хәлқара кәчүрүм тәшкилатиниң хелсинкидики тармақ оргинини зиярәт қилип, улар билән иш бирлики қурушни муһакимә қилған. Униң әскәртишичә, бу қетимқи зиярәттә оттуриға қоюлған “уйғур ирқий қирғинчилиқи” ға даир пикирләр финландийә һөкүмәт хадимлирини хелила тәсирләндүргән, зиярәт наһайити әһмийәтлик болған.

Б д т кишилик һоқуқ кеңишиниң алий комисари мишел бачелетниң 5-айда елип баридиған хитай зияритидин илгири, 2021-йили б д т тәрипидин һазирланған уйғурлар һәққидики доклатни елан қиливетишни қолға кәлтүрүш д у қ рәһбәрлириниң бу қетимқи зияритидики муһим мәзмунларниң бири болған. Д у қ ниң программа йетәкчиси зутрәтай бу һәқтә тохталғанда, өзлириниң финландийә һөкүмитидин б д т да мишел бачелетқа мушу мәсилә тоғрисида бесим ишлитишни тәләп қилғанлиқини тәкитлиди. У сөзидә, д у қ рәһбәрлириниң хелсинкида елип барған зиярәтлири давамида, финландийәдә һөкүмәт хадимлири билән уйғурларға даир қайсий мәсилиләрни конкирет сөзләшкәнликини вә улардин уйғурларниң қандақ тәләпләрни күтидиғанлиқини тилға алғанлиқиниму баян қилди.

Д у қ рәһбәрлириниң қаришичә, шималий явропадики дөләтләр ичидә норвегийә вә шиветсийәдә уйғурлар бирқәдәр көп болғанлиқи үчүн, у йәрдики паалийәтләр йолида давам қилип кәлмәктә икән. Бирақ финландийәдә яшайдиған уйғурлар көп болмиғачқа, финландийә һөкүмәт даирилириниң “уйғур ирқий қирғинчилиқи” тоғрисидики чүшәнчисиму юқири әмәскән. Бу бошлуқни толдуруш д у қ рәһбәрлириниң бу қетимқи финландийә сәпириниң асаслиқ мәқсәтлиридин бири болған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт