D u q rehberliri finlandiye hökümiti we parlaméntidin “Uyghur irqiy qirghinchiliqi” ni étirap qilishni telep qilghan

Ixtiyariy muxbirimiz ekrem
2022-04-29
Share
D u q rehberliri finlandiye hökümiti we parlaméntidin “Uyghur irqiy qirghinchiliqi” ni étirap qilishni telep qilghan Finlandiye parlaménti we hökümitidin “Uyghur irqiy qirghinchiliqi” ni étirap qilish we bu heqte qarar maqullashni telep qilip finlandiyege barghan d u q rehberliri. 2022-Yili 28-aprél.
RFA/Ekrem

D u q rehberliri finlandiye parlaménti we hökümitidin “Uyghur irqiy qirghinchiliqi” ni étirap qilish we bu heqte qarar maqullashni telep qilghan.

28-Aprildin étibaren finlandiye ziyaritini bashlighan d u q rehberliri paytext xélsinkida finlandiye parlaménti we hökümitige “Uyghur irqiy qirghinchiliqi” ni étirap qildurush üchün biryürüsh pa'aliyetlerni élip barghan. Bu ziyaretke d u q rehberliridin dolqun eysa, turghunjan alawudun we zumret'aylar qatnashqan.

D u q re'isi dolqun eysa ependi bügün bu heqte ziyaritimizni qobul qilghanda, “Uyghur irqiy qirghinchiliqi” ni finlandiye dölet erbablirigha anglitish we “Uyghur sot kollégiyesi” ning ötken yili bu xususta chiqarghan “Irqiy qirghinchiliq” qararini tonushturup, bir qisim démokratik gherb döletlirige oxshash finlandiyeningmu bu heqte qarar qobul qilishini qolgha keltürüshning bu qétimqi ziyaretning asasliq meqsiyi bolghanliqini tilgha aldi hemde bu ziyaretning ehmiyiti toghrisida toxtilip ötti.

D u q rehberliri finlandiye parlaménti we hökümitidin “Uyghur irqiy qirghinchiliqi” ni étirap qilish we bu heqte qarar maqullashni telep qilish pa'aliyitini bashliwetti. 2022-Yili 28-aprél.
D u q rehberliri finlandiye parlaménti we hökümitidin “Uyghur irqiy qirghinchiliqi” ni étirap qilish we bu heqte qarar maqullashni telep qilish pa'aliyitini bashliwetti. 2022-Yili 28-aprél.
RFA/Ekrem

D u q ijra'iye komitétining mu'awin re'isi turghunjan alawudun ependining bildürüshiche, d u q wekilliri bu ikki kündin buyan finlandiye tashqiy ishlar ministérliki we finlandiye parlaméntining xadimliri bilen körüshüp, muhim söhbetlerni élip barghan. Shuning bilen birge, xelq'ara kechürüm teshkilatining xélsinkidiki tarmaq orginini ziyaret qilip, ular bilen ish birliki qurushni muhakime qilghan. Uning eskertishiche, bu qétimqi ziyarette otturigha qoyulghan “Uyghur irqiy qirghinchiliqi” gha da'ir pikirler finlandiye hökümet xadimlirini xélila tesirlendürgen, ziyaret nahayiti ehmiyetlik bolghan.

B d t kishilik hoquq kéngishining aliy komisari mishél bachélétning 5-ayda élip baridighan xitay ziyaritidin ilgiri, 2021-yili b d t teripidin hazirlan'ghan Uyghurlar heqqidiki doklatni élan qiliwétishni qolgha keltürüsh d u q rehberlirining bu qétimqi ziyaritidiki muhim mezmunlarning biri bolghan. D u q ning programma yétekchisi zutret'ay bu heqte toxtalghanda, özlirining finlandiye hökümitidin b d t da mishél bachélétqa mushu mesile toghrisida bésim ishlitishni telep qilghanliqini tekitlidi. U sözide, d u q rehberlirining xélsinkida élip barghan ziyaretliri dawamida, finlandiyede hökümet xadimliri bilen Uyghurlargha da'ir qaysiy mesililerni konkirét sözleshkenlikini we ulardin Uyghurlarning qandaq teleplerni kütidighanliqini tilgha alghanliqinimu bayan qildi.

D u q rehberlirining qarishiche, shimaliy yawropadiki döletler ichide norwégiye we shiwétsiyede Uyghurlar birqeder köp bolghanliqi üchün, u yerdiki pa'aliyetler yolida dawam qilip kelmekte iken. Biraq finlandiyede yashaydighan Uyghurlar köp bolmighachqa, finlandiye hökümet da'irilirining “Uyghur irqiy qirghinchiliqi” toghrisidiki chüshenchisimu yuqiri emesken. Bu boshluqni toldurush d u q rehberlirining bu qétimqi finlandiye sepirining asasliq meqsetliridin biri bolghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet