Jenwediki foto süret körgezmiside jaza lagérliri bash téma qilindi

Ixtiyariy muxbirimiz ekrem
2020-09-25
Élxet
Pikir
Share
Print

D u q jenwede ötküzgen foto süret körgezmisi we b d t diki pa'aliyitini bügün netijilik axirlashturghan.

Jenwedin igiligen melumatlargha qarighanda, d u q 22-séntebirdin 25-séntebirgiche b d t binasi aldida ötküzgen jaza lagérlirigha qarshi foto süretler körgezmisi pa'aliyiti zor diqqet qozghidi.

D u q re'isi dolqun eysa ependi bu heqte ziyaritimizni qobul qilghanda, b d t kishilik hoquq kéngishining 45-nöwetlik yighini munasiwiti bilen jenwediki b d t binasi aldida ötküzülgen foto süret körgezmisi pa'aliyitining hersahe kishilerning diqqitini jelip qilghanliqini eskertti.

Bu qétimqi foto süret körgezmisi pa'aliyitige gérmaniye, shiwétsiye, shiwétsariyedin kelgen birqisim Uyghurlar qatnashqan bolup, pa'aliyetke ishtirak qilghan d u q ning programma yardemchisi ewa stokér xanimmu ziyaritimizni qobul qilip, 4 künlik bu pa'aliyetning netijilik ötküzülgenliki ipade qildi. U mundaq dédi: "Biz bu qétimqi süret körgezmisige jaza lagérlirigha qamalghan bir bölük Uyghurlarning resimlirini tallap kirgüzduq. Bu échinishliq körünüshler elwette, köpligen kishilerning küchlük diqqitini tartti. Biz bu arqiliq xitayning jaza lagérlirini derhal taqishi toghrisida b d t xadimlirigha jiddiy signal bérishni meqsed qilghan iduq. Menche, közligen meqsedke yettuq. Biz foto süret körgezmisi pa'aliyiti jeryanida yene köpligen yerlik kishilerge xitayning jaza lagérlirida yüz bériwatqan paji'elirini sözlep, ularning héssidashliqini qolgha keltürduq. Biz üchün bumu bir utuq hésablinidu."

Bu qétimqi foto süret körgezmiside xitayning jaza lagirlirini taqash we mejburiy emgekke xatime bérishtin ibaret ikki chong téma asasiy salmaqni igiligen.

D u q re'isi dolqun eysa ependining bildürishiche, ular bu qétimqi foto süret körgezmisi pa'aliyiti jeryanida birqisim döletlerning b d t diki elchiliri we b d t ning bezi munasiwetlik xadimliri bilen uchrushush ötküzüp, ulardin xitayning jaza lagérlirini derhal taqishi toghrisida chare-tedbir qollinishni telep qilghan.

Toluq bet