Dunya Uyghur qurultiyining 7-nöwetlik saylimigha qatnishidighan wekiller démokratik usulda saylap chiqilghan
2021.08.23
Asiya, yawropa, amérika, awistraliye qit'eliridiki Uyghurlar tunji qétim özining erkin iradisi bilen 7-nöwetlik d u q wekillirini saylap chiqti.
D u q ning teshebbusi bilen 22-awghust küni 4 qit'ediki 30 gha yéqin dölette oxshimighan shekillerde 7-nöwetlik d u q ning wekillirini békitish saylimi ötküzüldi hemde d u q telep qilghan 200 neper wekil xelqning erkin iradisi bilen saylap chiqildi.
Shu küni yawropa elliridin gérmaniye, norwégiye qatarliq döletlerdimu saylam élip bérilghan idi. Biz gérmaniyening myunxén shehride ötküzülgen saylam meydanigha yétip kelgen waqtimizda, zal ichidiki Uyghurlar qandaqtur büyük bir murasimgha teyyarliq qiliwatqandek hayajanliq keypiyatqa chömgen idi. Yighin riyasetchisining “Bu qétimqi saylam istiqlal marshimiz bilen bashlinidu” dégen izahati bilen kishiler orunliridin turushup, qollirini köksige qoyup sherqiy türkistanning istiqlal marshigha jör boldi.
Istiqlal marshidin kéyin sehnige chiqip söz qilghan d u q ning re'isi dolqun eysa ependi, bu qétimqi démokratik saylamning Uyghur millitige xeyirlik bolushini tilidi. Andin saylamgha nazaretchilik we riyasetchilik qilidighan 4 kishilik bir hey'et qol kötürüp awaz bérish usuli bilen saylap chiqildi. Bularning arisida d u q ning sabiq re'isi erkin alptékin ependimu bar idi. Bu hey'et sehnidin orun alghandin kéyin, erkin saylam yépiq awaz bérish sheklide resmiy bashlandi. Kishiler özi xalighan ademni d u q gha wekil qilip saylidi.
7-Nöwetlik d u q saylam komitétining re'isi perhat muhemmidi ependi bu qétimqi saylam toghriliq ziyaritimizni qobul qilghanda, bu küni dunyaning herqaysi elliride élip bérilghan saylam netijiside, 200 neper wekilning bu yil 11-ayda chéxiye paytexti paragada chaqirilidighan 7-nöwetlik qurultaygha resmiy wekil bolup tallan'ghanliqini bildürdi.
D u q saylam komitéti wekiller bölümining mes'uli turghunjan alawudun ependi bu heqte toxtalghanda, bu qétimqi saylamning nahayiti erkin, medeniy bir usulda élip bérilghanliqini tilgha aldi. D u q ning sabiq re'isi erkin alptékin ependi bolsa bu tarixiy saylamni uyushturghan d u q rehberlirini hemde saylamgha qatnashqan, saylamda ghelibige érishken barliq wetendashlirini qizghin tebrikleydighanliqini ipade qildi.
22-Awghust küni norwégiyediki Uyghurlarmu saylam élip barghan. Norwégiyede yashaydighan d u q ijra'iye komitétining mu'awin re'isi semet abla ependi bu xususta melumat bergende, osloda ötküzülgen bu saylamning nahayiti tertiplik, démokratik bir rewishte dawam qilghanliqini tilgha aldi. Mezkur saylamni uyushturghan norwégiye Uyghur komitétining re'isi bextiyar ömer ependimu norwégiyediki saylamning netijilik élip bérilghanliqini eskertti.
Bulardin bashqa, gérmaniyening karlisruxé we stutgart sheherliridiki Uyghurlarmu ilgiri-kéyin saylam ötküzgen bolup, ularmu erkin saylam arqiliq özliri xalighan kishilerni 7-qurultay üchün wekil qilip saylap chiqqan. Gérmaniyening bashqa sheherliri we yawropaning bashqa döletliridiki Uyghurlarmu oxshimighan usullarda özlirining wekillirini saylap chiqqan. Karlisruxé shehridiki Uyghur ziyaliysi enwer ehmet ependi bu heqte bizni qisqiche melumat bilen teminlidi.