7-Нөвәтлик д у қ сайлиминиң омумий нәтиҗиси елан қилинди

Ихтиярий мухбиримиз әкрәм
2021.08.25
Share on WhatsApp
Share on WhatsApp
7-Нөвәтлик д у қ сайлиминиң омумий нәтиҗиси елан қилинди 7-Нөвәтлик д у қ ниң вәкилләр сайлимида сайланған ханим-қизлардин өрнәк. 2021-Йили авғуст.
RFA/Ekrem

7-Нөвәтлик д у қ ниң омумий вәкилләр сайлимида 30 дөләттин 205 нәпәр рәсмий вәкил, 87 нәпәр кандидат вәкил сайлап чиқилған.

Д у қ 22-авғуст 30 дөләттә елип берилған 7-нөвәтлик д у қ сайлиминиң омумий нәтиҗисини 24-авғуст елан қилди. Бу мунасивәт билән д у қ рәиси долқун әйса әпәнди иҗтимаий таратқуларда нутуқ сөзләп, бу қетимқи сайламда ғәлибә қилған 205 нәпәр вәкилни тәбриклиди. У сөзидә уйғурларниң бу қетимқи демократик сайлам арқилиқ өзлириниң дөләт қуруш, дөләт башқуруш, өз вәкиллирини өзлири сайлаш иқтидариға игә мәдәний бир хәлқ болғанлиқини дуняға намайән қилғанлиқини тәкитлиди.

7-Нөвәтлик д у қ омумий вәкилләр сайлиминиң нәтиҗисидики бәзи нуқтилар диққәтни чекиду. Буниң бири, мәзкур сайламда вәкилликкә сайланған ханим-қизларниң сани 50 нәпәргә йәткән болуп, омумий вәкилләр нисбитиниң 24 пирсәнтни игилигән. Иккинчиси, алқинқи нөвәтлик қурултайларға селиштурғанда, бу қетимқи вәкилләр ичидә яшларниң салқими зор дәриҗидә ашқан. яш қиз-йигитләрдин вәкил болуп сайланғанларниң сани омумий вәкилләр саниниң үчтин биридин артуқрақини тәшкил қилған. Үчинчиси, бу қетимқи сайламға қатнашқан вә сайланған вәкилләр уйғур, қазақ, өзбик, татар қатарлиқ қериндаш милләтләрдин тәркип тапқан.

7-Нөвәтлик нөвәтлик д у қ сайлам тәйярлиқ комитетиниң рәиси пәрһат муһәммиди әпәнди бу һәқтә тохталғанда, 7-нөвәтлик д у қ омумий вәкилләр сайлиминиң қурултай рәһбәрлири күткән нәтиҗиләргә еришкәнликини тилға алди. 7-Нөвәтлик д у қ сайлими тәйярлиқ комитети вәкилләр бөлүминиң мудири турғунҗан алавудун әпәндиму ипадә билдүрүп, бу қетимқи сайламға узун йиллардин буян муһәҗирәттики миллий һәрикәт сепидин орун алған, вәтән-милләт үчүн биҗанидил хизмәт қилип кәлгән нурғунлиған пидакар уйғурларниң вәкил болуп сайланғанлиқини, буниң зор бир тарихий һадисә болғанлиқини тәкитлиди.

Д у қ иҗраийә комитетиниң муавин рәиси сәмәт абла әпәнди бу һәқтә пикир баян қилғанда, омумий хәлқ сайлими билән қурултай вәкиллирини бекитиш д у қ тунҗи қетим йолға қойған, синақтин өтмигән бир чарә болсиму, әмәлийәттә бу сайламниң күткәндин яхши усулда елип берилғанлиқини, буниң уйғур хәлқи вә дуня җамаитидә иҗабий тәсирләр пәйда қилғанлиқини әскәртти.

Д у қ рәһбәрлириниң билдүришичә, 7-нөвәтлик дуня уйғур қурултийи бу йил 11-айда чехийә пайтәхти пирагада чақирилидикән. Хәлқ тәрипидин сайлап чиқилған 205 нәпәр рәсмий вәкилниң бу йиғинда д у қ мәркизидин вәзипә елиш ишида сайлаш-сайлиниш һоқуқи болидикән. 87 Нәпәр кандидат вәкилниң сайлиниш һоқуқи болмисиму, сайлаш һоқуқи болидикән. 300 Гә йеқин киши қатнишидиған бу қурултайда д у қ ниң рәисидин тартип һәрқайси комитетларниң мудирлириғичә болған орунларға вәкилләрниң әркин ирадиси билән демократик усулда сайланған кишиләр вәзипигә олтуридикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.