7-Nöwetlik d u q saylimining omumiy netijisi élan qilindi

Ixtiyariy muxbirimiz ekrem
2021.08.25
Share on WhatsApp
Share on WhatsApp
7-Nöwetlik d u q saylimining omumiy netijisi élan qilindi 7-Nöwetlik d u q ning wekiller saylimida saylan'ghan xanim-qizlardin örnek. 2021-Yili awghust.
RFA/Ekrem

7-Nöwetlik d u q ning omumiy wekiller saylimida 30 dölettin 205 neper resmiy wekil, 87 neper kandidat wekil saylap chiqilghan.

D u q 22-awghust 30 dölette élip bérilghan 7-nöwetlik d u q saylimining omumiy netijisini 24-awghust élan qildi. Bu munasiwet bilen d u q re'isi dolqun eysa ependi ijtima'iy taratqularda nutuq sözlep, bu qétimqi saylamda ghelibe qilghan 205 neper wekilni tebriklidi. U sözide Uyghurlarning bu qétimqi démokratik saylam arqiliq özlirining dölet qurush, dölet bashqurush, öz wekillirini özliri saylash iqtidarigha ige medeniy bir xelq bolghanliqini dunyagha namayen qilghanliqini tekitlidi.

7-Nöwetlik d u q omumiy wekiller saylimining netijisidiki bezi nuqtilar diqqetni chékidu. Buning biri, mezkur saylamda wekillikke saylan'ghan xanim-qizlarning sani 50 neperge yetken bolup, omumiy wekiller nisbitining 24 pirsentni igiligen. Ikkinchisi, alqinqi nöwetlik qurultaylargha sélishturghanda, bu qétimqi wekiller ichide yashlarning salqimi zor derijide ashqan. Yash qiz-yigitlerdin wekil bolup saylan'ghanlarning sani omumiy wekiller sanining üchtin biridin artuqraqini teshkil qilghan. Üchinchisi, bu qétimqi saylamgha qatnashqan we saylan'ghan wekiller Uyghur, qazaq, özbik, tatar qatarliq qérindash milletlerdin terkip tapqan.

7-Nöwetlik nöwetlik d u q saylam teyyarliq komitétining re'isi perhat muhemmidi ependi bu heqte toxtalghanda, 7-nöwetlik d u q omumiy wekiller saylimining qurultay rehberliri kütken netijilerge érishkenlikini tilgha aldi. 7-Nöwetlik d u q saylimi teyyarliq komitéti wekiller bölümining mudiri turghunjan alawudun ependimu ipade bildürüp, bu qétimqi saylamgha uzun yillardin buyan muhejirettiki milliy heriket sépidin orun alghan, weten-millet üchün bijanidil xizmet qilip kelgen nurghunlighan pidakar Uyghurlarning wekil bolup saylan'ghanliqini, buning zor bir tarixiy hadise bolghanliqini tekitlidi.

D u q ijra'iye komitétining mu'awin re'isi semet abla ependi bu heqte pikir bayan qilghanda, omumiy xelq saylimi bilen qurultay wekillirini békitish d u q tunji qétim yolgha qoyghan, sinaqtin ötmigen bir chare bolsimu, emeliyette bu saylamning kütkendin yaxshi usulda élip bérilghanliqini, buning Uyghur xelqi we dunya jama'itide ijabiy tesirler peyda qilghanliqini eskertti.

D u q rehberlirining bildürishiche, 7-nöwetlik dunya Uyghur qurultiyi bu yil 11-ayda chéxiye paytexti piragada chaqirilidiken. Xelq teripidin saylap chiqilghan 205 neper resmiy wekilning bu yighinda d u q merkizidin wezipe élish ishida saylash-saylinish hoquqi bolidiken. 87 Neper kandidat wekilning saylinish hoquqi bolmisimu, saylash hoquqi bolidiken. 300 Ge yéqin kishi qatnishidighan bu qurultayda d u q ning re'isidin tartip herqaysi komitétlarning mudirlirighiche bolghan orunlargha wekillerning erkin iradisi bilen démokratik usulda saylan'ghan kishiler wezipige olturidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.