Қирғизистан уйғурлири 7-нөвәтлик д у қ вәкиллирини сайлап чиқти

Ихтиярий мухбиримиз ферузә
2021.08.24
Қирғизистан уйғурлири 7-нөвәтлик д у қ вәкиллирини сайлап чиқти Д у қ ниң 7-нөвәтлик қурултийиға қатнишидиған вәкилләрни сайлап чиқиш паалийитидә қирғизистан уйғурлири “иттипақ” җәмийитиниң рәиси әсқәр қасимоф нутуқ сөзлимәктә. 2021-Йили 22-авғуст, бишкәк,
RFA/Féruze

22-Авғуст күни дуняниң һәр қайси җайлирида яшаватқан уйғур җамаити 7-нөвәтлик дуния уйғур қурултийи вәкиллирини сайлаш паалийити өткүзүди. Шу қатарида қирғизистан уйғурлириму бишкәк шәһиридики аламедин мәһәллисигә җәм болуп, өз вәкиллирини сайлаш паалийити өткүзди.

Сайлам паалийити қирғизистан уйғурлири “иттипақ” җәмийити вә дуния уйғур қурлтииниң қирғизистандики вакалатчиси розимуһәммәт абдулбақийефниң рәһбәрликидә уюштурулди. Мәзкур паалийәткә бишкәк шәһири вә униң әтрапидики уйғурлар зич олтурлашқан йеза-шәһәрләрниң вәкиллири, аяллар комитети, ақсақаллар комитети вә җамаәт әрбаблири болуп, икки йүзгә йеқин киши қатнашти. Мәзкур паалийәт пәлсәпә пәнләрниң кондидат намзати, “иттипақ” гезитиниң муһәррири әкбарҗан бавудунофниң риясәтчиликидә елип берилди. Йиғинда д у қ 7-нөвәтлик вәкилләр қурултийиниң әһмийити, шундақла кейинки йилларда д у қ елип барған паалийәтлири һәмдә еришкән мувәппәққийәтлири кәң тонуштурулди. Йиғинда давамида йәнә қирғизистан уйғурлири “иттипақ” җәмийитиниң сабиқ рәиси дилмурат әкбәроф д у қ рәиси долқун әйса имзалаған тәшәккүрнамиләрни тәқдим қилди.

Д у қ ниң 7-нөвәтлик қурултийиға қатнишидиған вәкилләрни сайлап чиқиш паалийитидин көрүнүш. 2021-Йили 22-авғуст, бишкәк, қирғизистан.
Д у қ ниң 7-нөвәтлик қурултийиға қатнишидиған вәкилләрни сайлап чиқиш паалийитидин көрүнүш. 2021-Йили 22-авғуст, бишкәк, қирғизистан.

Игилинишичә, д у қ рәиси долқун әйса әпәнди бу қетимқи қурултайға мәйли қайсий дөләттә яшисун яки қандақ сиясий көзқарашқа игә болсун, вәтән вә миллити үчүн хизмәт қилишни халайдиған барлиқ уйғурларға дуня уйғур қурултийиниң ишикиниң очуқ икәнликини тәкитлигән. Қирғизистандики уйғурлар д у қ рәиси долқун әйса әпәндиниң бу чақириғиға аваз қошуп, бу қетимки қурултайға вәкил болуш үчүн актиплиқ билән өз намзатлирини көрсәткән, д у қ қирғизистандин 10 нәпәр вәкил сайлашқа сан бәргән.

Дуня уйғур қурлтийиниң қирғизистандики вакалатчиси розимуһәммәт абдулбақийеф радийомиз зияритимизни қобул қилип, 7-нөвәтлик вәкилләр қурултийиға вәккилләрни сайлаш вә рәсмий тәдбирләрни елип бериш үчүн мәхсус бир тәптиш қурулғанлиқи, дәсләптә қурултуйға вәкил болуш үчүн 27 кишиниң өзини намзатлиққа көрсәткәнликини баян қилип өтти.

Қирғизистанда уйғур тилида нәшр қилинидиған бирдинбир гезит- “иттипақ” гезити муһаҗирәттики уйғурларниң миллий мустәқилиқ йолида елип бериватқан паалийәтлири тоғрисида нурғун мәлуматларни бәрмәктә, шу җүмлидин д у қ ниң 7-нөвәтлик вәкилләр қурултийи тоғрисидиму мәзкур гезиттә толуқ мәлумат берилди. Сайлам паалийити давамида қирғизистан уйғурлири “иттипақ” җәмийитиниң рәиси әсқәр қасимоф нутуқ сөзләп, “иттипақ” җәмийитиниң қирғизистандики уйғур җамаити үчүн елипо барған паалийәтлири вә д у қ ниң паалийәтлири һәққидә мәлумат бәрди.

Мәзкур паалийәткә қатнашқан “иттипақ” җәмийити ақсақаллар кеңишиниң әзаси абдуқейим розийеф әпәнди зияритимизни қобул қилип, 7-нөвәтлик вәкилләр қурултийиға алий билимлик вә тәҗрибилик вәкилләр сайланғанлиғини тилға алди. У дуня уйғур қурултейиниң бу йил ноябирда ечилидиған 7-нөвәтлик сайлимидин зор үмидләр күтидиғанлиқини билдүрди.

Қирғизистан, қазақстандин қалса оттура асияда уйғурлар бир қәдәр көп вә зич олтурлашқан бир мәмликәттур. Қирғизистандики уйғурлар уйғур хәлқиниң миллий мустәқиллиқ күрәшлири йолида өзлириниң имаканийити яр бәргән даиридә түрлүк тиришчанлиқларни көрсәтмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.