D u q hey'iti sidnéydiki yerlik parlaméntningmu “Uyghur qirghinchiliqi” ni étirap qilishini telep qilghan
2022.11.25

Dunya Uyghur qurultiyi we lagér shahitliridin terkib tapqan bir hey'et, 11-ayning 25-küni awstraliyening sidnéy shehiridiki yerlik parlaméntida doklat bérip, Uyghurlarning hazirqi éghir weziyiti toghrisida etrapliq melumat bergendin kéyin “Uyghur qirghinchiliqi” ni étirap qilishini telep qilghan.
Mezkur pa'aliyet heqqide bu pa'aliyetni uyushturghan awstraliye Uyghur jem'iyitining re'isi memet obul mundaq dédi: “Bügün biz awstraliye Uyghur jem'iyitining orunlashturushi bilen sidnéydiki shtatliq parlaméntta doklat bérish yighini ötküzduq. Bu yighinda ikki neper lagér shahitimiz guwahliq berdi. D u q ijra'iye komitéti re'isi ömer qanat ependi we Uyghurlar toghrisida köp tetqiqatlar élip barghan mutexessislermu Uyghurlar toghrisida doklat bergen boldi. Doklat bérish yighinining axirida yighin ehli doklat bergüchilerdin so'al soridi. Yighin axirlashqandin kéyin bezi yerlik parlamént ezaliri bilen körüshtuq”.
Mezkur hey'et - 25noyabir chüshtin kéyin sidnéy téxnika uniwérsitétida söhbet yighinigha ishtirak qilghan. Memet obul ependi bu heqtimu melumat berdi. U, mundaq dédi: “Chüshtin kéyin sidnéy téxnika uniwérsitéti xitay tetqiqat merkizide mutexessisler bilen söhbet yighini ötküzduq. 2 Sa'et dawamlashqan söhbet jeryanida d u q hey'iti, lagér shahitliri xitayning sherqiy türkistanda élip bériwatqan zulumini etrapliq anglitish bilen birlikte, awstraliye hökümitining shundaqla sidnéydiki yerlik parlaméntning <Uyghur qirghinchiliqi>ni étirap qilip qarar maqullishini we sherqiy türkistanda mejburiy emgek arqiliq ishlep chiqirilghan mehsulatlarning awstraliyege élip kirilishini cheklishini telep qilduq”.
Sidnéydiki yerlik parlamént bilen sidnéy téxnika uniwérsitétidiki yighinlarda gollandiyediki lagér shahiti qelbinur sidiq bilen ömerbek ali ependimu guwahliq bergen. Qelbinur sidiq xanim bu heqte mundaq dédi: “Biz awstraliyede pa'aliyet élip bériwatqili 3 kün boldi. Bügün sidnéydiki yerlik parlaméntning zalidiki yighinda guwahliq berduq. Buninggha Uyghurlar we parlamént ezaliridin bolup xéli köp kishi qatnashti. Parlamént ezaliri bizning guwahliqlirimizni anglighandin kéyin nahayiti yaxshi inkaslarni qayturdi. Biz doklatlirimizda ulargha bolghan teleplirimiznimu otturigha qoyghaniduq. Ularning beziliri bizge, <sherqiy türkistanda rastinila irqiy qirghinchiliq yüz bériwatidu. Hazir karantinni bahane qilip turup ach qoyup öltürüsh we xitayning Uyghurlargha élip bériwatqan siyasetlirining hemmisi irqiy qirghinchiliqqa kiridu, bularni toxtitish üchün tedbir élishimiz kérek> déyishti. Menche sidnéydiki pa'aliyitimizmu yaxshi ötti”.
D u q re'isi dolqun eysa bashchiliqidiki hey'et awstraliyediki 10 künlük ziyaritining birinchi we ikkinchi künliri awstraliye parlaméntidiki öktichi partiyelerning rehberliridin sabiq dölet mudapi'e ministiri pétér dutton (Peter Dutton) qatarliq 20 etrapida parlamént ezasi bilen körüshkendin sirt, tashqi ishlar ministirliqi bilen köchmenler idarisining mes'ulliri bilenmu uchriship, Uyghurlarning nöwettiki jiddiy ehwalini anglatqanidi.