D u q merkizi zalida 8-qurultayning wekiller saylimi ötküzüldi

28-Iyul küni gérmaniyening myunxén shehiridiki d u q ning xizmet binasida 8-nöwetlik qurultayning gérmaniyediki wekillirini saylash pa'aliyiti ötküzüldi. Saylamgha myunxén shehiridiki Uyghur jama'itidin yüzge yéqin kishi qatnashti. Bu kün “28-Iyul yerken qirghinchiliqi” ning 10 yilliq xatire küni bolghach, pa'aliyet aldi bilen shéhitlerning rohigha du'a-tilawet qilish bilen bashlandi.

Tunji bolup nutuq sözligen d u q re'isi dolqun eysa ependining bildürüshiche, bundin 10 yil muqeddem yerkende yüz bergen qetli'amda xitay hakimiyiti 90 din artuq ademning ölgenlikini ilgiri sürgen. Emeliyette 3 mingdin 5 mingghiche bolghan Uyghur qirghin qilin'ghan. Bu 2009-yili 5-iyul yüz bergen ürümchi qirghinchiliqidin kéyinki yene bir zor qirghinchiliq hésablinidiken.

RFA/Ekrem

8-Nöwetlik d u q wekiller saylimi bashlinishtin ilgiri, 5 kishilik saylam nazaret guruppisi saylap chiqildi. Andin myunxén shehiridin özini wekillik namzatliqigha körsetküchiler bir birlep sehnige chiqip, özining kechmishliri, pa'aliyetliri we bundin kéyin weten-millet yolida qilmaqchi bolghan xizmetliri heqqide iradilirini ipade qilip ötti.

8-Nöwetlik d u q wekilliri üchün gérmaniyege bérilgen san 17 bolup, gérmaniyening bashqa sheherliridiki bir qisim Uyghurlar saylamgha tor arqiliq qatnashti. Uyghur jama'iti özini wekillikke tizimlatqan 35 kishidin 17 kishini démokratik usulda saylap chiqti.

D u q re'isi dolqun eysa ependi bu saylam munasiwiti bilen ziyaritimizni qobul qilghanda, xitayning Uyghurlarni dunyagha qalaq, radikal körsitip kéliwatqanliqini eskertip, muhajirettiki dölet qurush istikide boluwatqan Uyghurlarning teshkilat rehberlirini démokratik usulda saylap chiqip, xelq'aragha özlirining neqeder medeniy bir millet bolghanliqini namayan qilishining tolimu zörürlükini tekitlidi. U sözide yene, Uyghurlarning dölet bashquralaydighanliqini, öz özini idare qilalaydighanliqini, özining kélechektiki dölet rehberlirini démokratik saylam arqiliq berpa qilalaydighanliqi hazirdin bashlap dunyagha bildürüshning muhimliqini bayan qildi.

RFA/Ekrem

Bu qétimqi saylamgha riyasetchilik qilghan turghunjan alawudin ependining bildürüshiche, birqanche kündin buyan Uyghurlar merkezliship olturaqlashqan 11 dölette resmiy saylam élip bérilghan. Yene 13 dölette, d u q wekillirini shu yerdiki xelqler we teshkilatlar belgilep bergen. 8-Nöwetlik qurultay üchün jem'iy 157 neper resmiy wekil saylan'ghan.

5 Kishilik saylam nazaret guruppisining ezasi ablimit tursun ependining bayan qilishiche, myunxénda ötküzülgen bu qétimqi saylam adil we xatasiz ötküzülgen. Saylamda weten-millet üchün bejanidil xizmet qilish jasaritige ige bolghan yashlarni saylashqa köprek ehmiyet bérilgen.