Dunya Uyghur qurultiyi 8-nöwetlik wekiller qurultiyining teyyarliq xizmetliri resmiy bashlandi

Enqeredin ixtiyariy muxbirimiz erkin tarim teyyarlidi
2024.06.07
duq-rehberliri Dunya Uyghur qurultiyining 7-nöwetlik rehberliri.
Dunya Uyghur Qurultiyi

Dunya Uyghur qurultiyi 5-iyun küni mexsus bayanat élan qilip, 8-nöwetlik wekiller qurultiyining 2024-yili 10-ayning axirqi heptisi melum bir dölette ötküzülidighanliqini jakarlidi.

D u q re'isi we ijra'iye komitétining tewsiye qarari, 1-iyun küni chaqirilghan ijra'iye komitétining kéngeytilgen yighinida birdek awaz bilen qobul qilinip, 8-nöwetlik wekiller qurultiyigha teyyarliq qilish komitéti qurup chiqildi. Yighinda dunya Uyghur qurultiyining teshkiliy xizmetlirige mes'ul mu'awin re'isi perhat muhemmedi ependi teyyarliq komitétining re'islikige saylap chiqildi. Yighinda 8-nöwetlik omumi wekiller qurultiyining resmiy wekillirining omumi sani, 24 dölettin 157 neper qilip békitildi we kandidat wekillik tüzümi emeldin qalduruldi. Yighinda, qurultay wekillirini dunyaning her qaysi jaylirida saylam ötküzüp, saylap chiqish qarar qilindi.

Biz bu toghriliq téximu tepsiliy melumat igilesh üchün, d u q re'isi dolqun eysa bilen söhbet élip barduq. U aldi bilen bu qétimqi qurultayning zor ehmiyetke ige ikenlikini bayan qildi. U, mundaq dédi: “Dunya Uyghur qurultiyining 8-nöwetlik wekiller qurultiyi, xitay hakimiyiti sherqiy türkistandiki irqiy qirghinchiliq jinayitini dawam qilduruwatqan, dunya döletliri birleshken döletler teshkilatida Uyghur mesiliside xitaygha qarshi turush yaki qollash boyiche ikki qutupqa bölün'gen, shundaqla, dunyaning siyasiy weziyitide zor burulush yüz bériwatqan, dunyaning diqqiti ukra'ina urushi, isra'iliye bilen pelestin toqunushigha merkezleshken, xitay bu pursettin paydilinip, bar küchi bilen Uyghur irqiy qirghinchiliqining üstini yépishqa tirishiwatqan pewqul'adde bir peytke toghra keldi. Dunya Uyghur qurultiyining, nöwette xelq'arada milliy dewayimizgha wekillik qiliwatqan merkiziy teshkilat bolush süpiti bilen milliy herikitimizdiki mes'uliyiti we mejburiyiti herqandaq waqittikidin téximu éship barmaqta. Shunga, 8-nöwetlik qurultayning muweppeqiyetlik échilishi muhajirettiki milliy azadliq herikitimizning bundin kéyin hem izchil, sistémiliq we utuqluq dawam qilishida zor ehmiyetke igidur.”

Dunya Uyghur qurultiyining teshkiliy xizmetlerge mes'ul mu'awin re'isi perhat muhemmidi ependi bu qétimqi qurultayda bolidighan yéngiliqlar toghrisida melumat bérip mundaq dédi: “Qurultayning teyyarliq xizmetlirini jiddiy élip bériwatimiz. 10-Ayning axirida chaqirilidighan dunya Uyghur qurultiyining 8-nöwetlik qurultiyi, her qaysi döletlerdiki Uyghur teshkilatliri we jama'etchiliki teripidin démokratik usul bilen saylap chiqilghan qurultay wekilliri, musteqil közetküchiler we teklip qilin'ghan alahide méhmanlarning ishtirak qilishi bilen ötküzülidu. Qurultayda dunya Uyghur qurultiyining ötken 3 yilliq xizmet doklati, maliye doklati teqdim qilinidu, shundaqla milliy dewayimizni téximu küchlendürüshning chare-tedbirliri we istratégiyeliri heqqide muzakire élip bérilidu. Qurultay axirida bu toghriliq qararlar qobul qilinidu.”

 D u q re'isi dolqun eysa ependi saylamda islahat élip bérilidighanliqini bayan qilip mundaq dédi: “Dunya Uyghur qurultiyi wekillik saylimi we rehberlik saylimida yéngi islahat élip bérilidu. Yeni, d u q ning ijabiy en'enisige warisliq qilish bilen birge, bügünki dunyaning yüzlinishige mas xizmet qilalaydighan qabiliyetlik we jenggiwar yéngi rehberlik qoshuni démokratik shekilde saylap chiqilidu. Wekiller we rehberlik qatlimida yashlar we ayallarning nisbitige alahide ehmiyet bérilidu.”

D u q ning saylam ishlirigha mes'ul rehbiri turghunjan alawudun ependining bildürüshiche, bu qétimqi qurultay her qaysi döletlerdiki sherqiy türkistanliqlarning démokratik usul bilen saylap chiqqan qurultay wekilliri, jama'et erbabliri, tonulghan ziyaliylar, közetküchiler we teklip qilin'ghan alahide méhmanlarning qatnishishi bilen ötküzülidighan bolup, hazirdin bashlap aldi bilen qurultayning wekil namzatliqigha iltimas qilishi kérek iken. D u q ning nizamnamisidiki belgilimilerge we ijra'iye yighinida élin'ghan qarargha asasen bularning ichidin 157 kishi resmiy wekil bolup tallinidiken.

Qurultay nizamnamisi boyiche, her üch yilda bir qétim ötküzülidighan we eslide 2020-yili 11-ayda ötküzüsh qarar qilin'ghan 7-nöwetlik wekiller qurultiyi korona wabasi sewebidin bir yil kéchiktürülüp, 2021-yili 11-ayda ötküzülgenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.